Helios y CAI Santiago plantan cara pero ceden debant d’o Figueres

Totz dos equipos aragoneses d'a División d'Honor de tenis de mesa, o CAI Santiago y o CN Helios, cayoron redotaus debant d'o Tramuntana Figueres, un rival directo ta totz dos en la luita por a salvación, que con istes dos achustaus triumfos se distancia d'a zona periglosa.

Jorge Cardona (CAI Santiago) venció en os suyos dos individuals. (Foto: Comunicación Tenis de Mesa)

O CAI, que contina arrocegando a important baixa d’o lesionau Jorge Gambra, estió a punto de dar a sorpresa debant d’un equipo de mayor potencial, pero os visitants se levoron a victoria por 3-4 dimpués d’o dobles decisivo, en o qual a parella formada por o ex palista de Súper División Jordi Piella y o suyo companyero Pau Gaju s’imposó por 1-3 (dos d’os sets se decantoron por 9/11) a os aragoneses Jorge Cardona y Alberto Luño.

Antes d’ixo, Cardona sumó os suyos dos individuals frent a Gaju y o chino Long Ling Yi, y Luño aconsiguió tamién superar a Gaju, encara que perdió contra Piella, o millor chugador espanyol d’a liga. Totz dos chovens aragoneses cuaxoron grans trobadas, más que más Luño debant de Gaju, y Cardona debant de Long.

D’atra man, l’infantil Raúl Maicas, que debutaba en substitución de Gambra, poco podió fer en os suyos dos partius.

O domingo tamién Helios cedió debant d’o Figueres, ista vez por 2-4, dimpués que Alfonso Beamonte deixase escapar quatro bolas de partiu frent a Pau Gaju, en o zaguer individual que hese forzau o dobles.

Beamonte cayó tamién contra o base Jordi Piella, y o tercer chugador azulón, Víctor Dobato, tornó a perder os suyos dos partius, por o qual, de brenca sirvioron totz dos meritorios puntos lograus por o chileno Marcelo Toledo debant de Long y Gaju.

Con istes resultaus, Helios y CAI Santiago se mantienen empataus en a tabla con seis victorias, encara que os caístas han disputau un partiu menos, y totz dos continan a o borde d’a baixada, menazaus por o debantzaguer y debantdebantzaguer clasificaus que contan solo que con un triumfo menos.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.