Historico d’ETA

A violencia ha deixau más de 1000 muertos en os zaguers 50 anyos

Acababa o decenio d’os 50 quan un grupo de chovens vascos decidiban escindirse d’as choventutz d’o PNV y fundar ETA ta luitar contra o franquismo. Os primers *asesinatos se producen en 1968, una d’as primeras victimas ye Melitón Manzanas, a qui s’acusa de ser chefe d’a policia secreta en o Pais Vasco. A rispuesta d’a dictadura franquista ye a detención d’a cupula d’ETA.

A presión popular y entrenacional priva la condena a muerte de 6 d’os liders d’ETA dimpués d’o proceso de Burgos en 1970. Pero l’atentau mas significativo plega en 1973 quan a banda terrorista asasina a Carrero Blanco, president d’o gubierno, y clamau a succeder a o dictador.
A primer matanza masiva data de l’anyo 74, en Madrid y ubriría tamién una crepa en ETA. En l’anyo 1977 ETA s’escinde, entre os clamaus politicos y militars. Dimpués d’ixa división prencipia o decenio más sangriento. En istos anyos uitanta, ETA mata a 400 presonas. A os atentaus contra militars y policias s’adhiben tamién matanzas como l’atentau contra l’Hipercor de Barcelona u la casa quartel de Zaragoza.

Son os anyos d’a guerra sucia: os GAL asasinan a 23 personas. En 1989 ETA declara una tregua y se reune con o gubierno espanyol de Felipe González en Archel..as conversas no van bien y tres meses dimpués se reprencipia a violencia.

Dimpués d’o descapezamiento d’a cupula etarra en Bidart, en 1992, ETA cambea d’estratechia y empecipia a atentar prencipalment contra politicos. Un d’os primers, en 1995, Gregorio Ordóñez, d’o Partiu Popular. Un anyo dimpués empecipia o secuestro más luengo, o de José Antonio Ortega Lara, funcionario de garcholas que será reteniu por ETA más de 500 diyas. En chulio, se marca un d’os puntos d’inflexión en a reaccion ciudadana contra la violencia. O conceller popular d’Ermua Miguel Ángel Blanco ye secuestrado y os terroristas menazan con matar-lo en dos diyas si no s’amana a os presos vascos a Euskal Herria. O gubierno espanyol d’Aznar no accepta as condicions d’ETA y as manifestacions en toda Espanya no privan l’asesinato de Blanco.

Dimpués d’ixa muerte brenca será igual, en primeras ETA declara un alto o fuego incondicional, en 1998 y o gubierno d’o PP decide intentar negociar una fin a la violencia. O gubierno d’Aznar amana presos y charra d’o “Movimiento de Liberación Nacional Vasco”, pero en setiembre d’o 99 as negociacions se dan por trencadas y ETA reenceta a suya actividat con a muerte d’o Tenient Coronel Pedro Blanco y un anyo mas tarde d’o politico socialista Ernest Lluch.

Allora empecipia una nueva estratechia de l’estau contra la banda. O gubierno d’o PP, emparau por o PSOE apreba a Lei de Partius en 2002 que suposa a ilegalización de Batasuna y as suyas succesoras. Ya con José Luis Rodríguez Zapatero en o gubierno l’actividat terrorista contina dica 2006 quan ETA declara un alto o fuego. Zapatero responde pedindo permiso a o Congreso ta encetar conversacions, pero o 30 d’aviento d’ixe mesmo anyo ETA coloca un auto bomba en a T-4 de Madrid que acaba con a negociación.

A presión policial sobre a banda s’intensifica. Entre 2008 y 2009 os succesivos chefes d’ETA son detenius. Primero Thierry, en Burdeos, dimpués Txeroki, en Cauterets, y o zaguer Jurdan Martitegi en abril de 2009. En chulio d’ixe anyo se producen as zagueras accions violentas; en chulio un auto bomba esclata en Burgos y unatro en Palma de Mallorca matando a dos guardias civils. En 2010, en Marzo, en a suya zaguer muerte, ETA mata a un chendarme en Francia dimpués d’un atraco. Dende 2010, y con os esferents pactos y declaracions, a cucha abertzale, con la adhesión de Eusko Alkartasuna, por eixemplo, ha prebau d’empentar a la banda enta las vias politicas. ETA declara un alto o fuego en setiembre de 2010 que leva a la zaguera declaración d’o fin d’a luita armada, que as consultas con os presos apreboron, y a cupula terrorista ha acceptado.

A violencia d’ETA y a rispuesta de l’estau ha deixau más de 1000 muertos en os zaguers 50 anyos. Una violencia que pareixe que por fin remata.

2 Rispuestas a Historico d’ETA

  1. Sin dandaliar,una buena notizia. Sapeis a unica cosa d’iste diya istorico que no me cuaca zarrapita? que l’apatusco de punta a coda que ye Zapatero va a pasar a istoria como lo president que gubernó cuan ETA dixò as armas. Imachino que agora ha d’istar mui pincho.

  2. No gosa contemplar-se en dengún analisi. Pero ta yo o atentau d’o terroismo islamista d’o 11M, estando un feito esterno ta o fenómeno de ETA, ye un factor clave d’o proceso d’o maduración enta la superación d’a luita armada u estratechia guerrista.

    Me creigo que provocó bella riflesión en contra d’o terrorismo, que se i veyería más como un problema en si mismo y se tornaría más dificilment chutificable.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.