Hitzargiak, fendo partache de buenas practicas en luengas minorizadas.

L'aragonés estió una d'as luengas protagonistas en l'alcuentro

Imachen de l'alcuentro Hitzargiak.

Imachen de l’alcuentro Hitzargiak.

Los pasaus días 23 y 24 de chunyo tenió lugar en l’Orona Ideo d’Hernani (País Basco) l’alcuentro “Hitzargiak, luengas que s’alumbran mutuament” organizau por Soziolinguistika Klusterra adintro d’o prochecto que, con ixe mesmo nombre, s’ha desembolicau en o marco d’a Capitalidat Europea d’a Cultura 2016 de Donostia.

Lo prochecto Hitzargiak mira de creyar nuevas relacions entre las comunidatz d’idiomas y parladors immersos en procesos de revitalización lingüistica, enfortindo las ya existents. Lo prochecto se centra en compartir las experiencias y procedimientos innovadors, adequaus, exitosos u eixemplars con atras comunidatz lingüisticas.  Mira de chenerar efectos multiplicadors amostrando ixas “buenas practicas” que pueden fer honra en atras luengas, y propiciando colaboracions entre las comunidatz lingüisitcas, enfortindo asinas los movimientos de revitalización lingüistica. La pachina web hitzargiak.eu ha replegau mas d’un centenar de buenas practicas en 25 luengas, entre ellas l’aragonés.

En iste contexto, l’aragonés ha estau una d’as luengas protagonistas d’Hitzargiak, con 10 buenas practicas destacadas en a suya web. En o capitol de medios de comunicación figuran iste medio, Arredol, y la revista Bisas de lo Subordán. En l’apartau cultural incluyen los Premios Condau de Ribagorza, las Chornadas de Llenguas d’el Pirineu de Graus y la iniciativa editorial Edicions Transiberiano.  En o cabo de Pensamiento/Sensibilización se presentan las actividatz d’o Seminario Aragonés de Sociolingüistica y la plataformaEsfendemos as Luengas. La sección d’educación d’adultos presenta las actividatz d’a Escuela d’Aragonés Nogará y d’a Trobada Vivir en Aragonés. En l’apartau de nuevas tecnolochías s’ha destacau lo treballo de Softaragonés. Amás de figurar en a web y en o dossier d’Hitzargiak, los asistents a l’alcuentro Hitzargiak podioron leyer mas sobre istas actividatz en cartels instalaus en a siede d’a Trobada.

L’alcuentro d’os días 23 y 24 de chunyo estió organizau en forma de mesas redondas tematicas y espacios d’intercambio, en as quals se presentaban 3-4 iniciativas sinyaleras de cada ambito, con posterior discusión y debate. Asinas, i habió mesas redondas sobrerechistro de patrimonio oral, escuelas infantils, nuevas tecnolochías, transmisión intercheneracional, actividatz reivindicativas, lo paperd’as academias, las luengas como impulso d’a economía, la suya importancia en a ordenación territorial, l’aprendizache en a edat adulta, iniciativas pa impulsar l’uso d’a luenga con parellas lingüisticas de conversa u los medios de comunicación, entre atros. Por parte de l’aragonés, la organización convidó a Juan Pablo Martínez, de Softaragonés a fer parte d’a mesa sobre tecnolochías, presentando lo suyo treballo y fendo partache d’experiencias con atras iniciativas. Tanto en iste como en a resta de temas de treballo, los asistents han puesto escambiar ideyas y experiencias, plantando las simients de nuevos prochectos.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.