Imputan a o director de Gara enaltecimiento d’o terrorismo por un articlo d’opinión

L'Audiencia Nacional espanyola clama a declarar como imputau por enaltecimiento d'o terrorismo a Iñaki Soto, director d'o diario Gara, por una carta publicada en iste diario

Audiencia Nacional. Foto: Wikipedia

Hue Iñaki Soto, director d’o diario vasco Gara, acudió a la Audiencia Nacional espanyola ta declarar en calidat d’imputau por un presunto delito d’enaltecimiento d’o terrorismo debiu a una carta a o director publicada en agosto pasau que feba referencia a o 25 cabo d’anyo d’as muertes d’os militants d’ETA Maite Pérez y Rafa Etxebeste en Sant Sebastián en 1987 mientres manipoliaban un artefacto explosivo. A citación, que ye d’o 14 d’aviento, no precisaba nian de que delito se le imputaba.

A Fiscalía de l’Estau ha prencipiau iste proceso, que leva o chuez Eloy Velasco. Tamién son imputaus, y tamién estioron clamadas a declarar, as seis personas que sinyoron a carta, entre ellas una persona menor d’edat. Os seis imputaus se declaroron responsables de l’autoría d’a carta, fueras d’a menor d’edat, y no declaroron garra cosa mas a o chuez. Manimenos, Eloy Velasco ha quiesto ir dillá d’istas imputacions y ha quiesto imputar a o director de Gara, Iñaki Soto, por permitir a publicación d’ixa carta.

Iñaki Soto ha declarau que a suya imputación “no tien sentiu churidico” y que a función d’o diario ye “guaranciar a libertat d’expresión, no chudgar”. Ha acceptau a responsabilidat d’o que se publica en Gara, encara que ha dito no puede controlar tot o que se i publica. Asinas mesmo ha opinau que a carta “fabla de l’aimor” y que “a chusticia alazetada en odio no ye pas chusticia”.

O delito d’enaltecimiento d’o terrorismo puede carriar penas de dica dos anyos de garchola.

Una rispuesta a Imputan a o director de Gara enaltecimiento d’o terrorismo por un articlo d’opinión

  1. Pingback: Imputan a o director de Gara enaltecimiento d’o terrorismo por un articlo d’opinión | AraInfo | Achencia de Noticias d´Aragón

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.