Imputau por intrusismo un falso guida de montanya que se cacegó

A Guardia Civil lo imputó dimpués d'haber d'ir a escar-lo en cacegar-se con una muller a la que "guidaba"

Mapa d'o accident (Imachen: Guardia Civil)

Mapa d’o accident (Imachen: Guardia Civil)

A Guardia Civil ha imputau por intrusismo profesional, dimpués d’haber de rescatar-lo, a un falso guida d’alta montanya que no teneba a titulación que cal y que se ufriba a traviés d’una pachina web. Como conseqüencia d’una d’as actividatz de montanya que ufriba resultoron con feridas grieus una muller y o guida.

A investigación que prencipió lo pasau mes de chuliol, dimpués d’o rescate reyalizau por l’Equipo de Montanya d’a Guardia Civil de Pandicosa, chunto con l’helicoptero d’o cuerpo y un medico d’o 061, con enchaquia d’un accident grieu que sufrioron dos montanyers, un hombre y una muller, quan baixaban d’o Pico d’Os Moros. En travierar un nevero esbarizoron más de 60 matros, sufrindo os dos feridas grieus y habendo d’estar levaus ta l’Hespital Miguel Servet de Zaragoza.

Se prencipioron alavez chestions ta conoixer os feitos, resultando que a cursa heba estau achustada por a muller, de Madrit, qui pagó 180 euros a o falso guida, tamién de Madrit, qui feba publicidat d’un programa d’actividatz que clamaba “Tremils en o diya (Pirineus)”. Iste programa ufriba puyadas ta diferents tucas de más de tres mil metros d’altaria acompanyaus por un profesionals titulau en montanya, seguro sanitario ta l’actividat, material, etc…

En a investigación se podió comprebar que o supuesto guida no teneba titulación de “Tecnico Esportivo Superior d’Alta Montanya” ta poder treballar como guida en ixa materia”.  O guida yera habilitau como “Tecnico Esportivo en Media Montanya” nomás, no podendo fer as actividatz que feba. Antimás tampoco no teneba o debantdito seguro sanitario.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.