Imputaus 10 falsos pais y os suyos 132 suposaus fillos por falsificar documentos ta obtener o permiso de residencia

Os ficticios descendents bosaban entre 2.000 y 3.000€ por trobar un prochenitor de nacionalidat espanyola y regularizar asinas a suya situación en Espanya como familiars de comunitario.

Pasaporte espanyol. (Foto: wikipedia)

Achents d’a Policía Nacional han deteniu a 30 personas y imputau a 142 mas por delitos de favoreiximiento d’a immigración ilegal, estafa a l’Administración Publica y falsedat documental. Finxiban estar pais y fillos, por meyo de partidas de naixencia y atros documentos falsos, ta obtener o permiso de residencia. Os ficticios descendents bosaban entre 2.000 y 3.000€ por trobar un prochenitor de nacionalidat espanyola y regularizar asinas a suya situación en Espanya como familiars de comunitario. Entre os detenius se troba un advogau en exercicio y treballador en una NGO que se fació pasar por pai de cinco fillos. Tamién una d’as mullers investigadas “reagrupó” a os suyos suposaus 21 fillos, totz ells naixius en o plazo de tres anyos.

A investigación prencipió a meyaus d’o mes d’aviento de 2011 quan se produció a detención d’un d’os suposaus prochenitores, advogau en exercicio y treballador en una NGO d’aduya a os toxicomanos en Zaragoza, que heba aconseguiu “reagrupar” a cinco ciudadans extranchers como os suyos suposaus fillos. Dos d’as extrancheras en situación irregular, a las quals heba cobrau 2.400 euros, portiaban en l’inte d’a detención a suya partida de naixencia orichinal, que cosa heba de veyer con a que heban entregada en l’Administración ta regularizar a suya situación en o nuestro país.

A partir d’istes arrestos, s’intensificoron as indagacions sobre 17 retz que operaban con o mesmo modus*operandi a lo largo de tot o territorio. Os autors d’istes feitos ilicitos presentaban as diferents solicitutz de reagrupación debant d’as Usinas d’Extranchers correspondients, an aportaban documentación falsa en a que se feban pasar por pais u mais d’os solicitants. Actuaban contractaus por personas extrancheras en situación irregular en Espanya que no reuniban os requisitos ta estar beneficiarios d’un permiso de residencia y por meyo d’a estafa a os organismos publicos pretendeban aconseguir que les concedesen os permisos necesarios ta residir en Espanya.

 

Situacions familiars imposibles

Con toda a documentación obtenida en o transcurso d’a operación, os investigadors profundizoron en os diferents retz, que actuaban en as provincias de Madrit, Toledo, Guadalachara y Logronyo, descubrindo numerosos casos de regularización que por as suyas qualidatz yeran inviables. En una ocasión, una muller aconsiguió reagrupar a 21 suposaus fillos, naixius totz en un plazo no superior a cinco anyos. En unatro caso, una supuesta mai habría dau a luz a cinco fillos en 1989, y a atros quatro en 1990, totz de diferents partos.

Unatra d’as reagrupacions chocants yera a d’un ciudadano naixiu de Guinea equatorial, nacionalizau espanyol, que sin haber abandonau dende feba 30 anyos Espanya, presentó distintas partidas de naixencia ta suposaus descendents suyos, naixius entre 1990 y 1991 en o suyo país d’orichen.

Finalment l’operativo ha culminau con a detención de 30 personas (en a suya mayoría de nacionalidat guineana) en Aragón, 7 d’ells suposaus prochenitors y os atros 23 suposaus fillos. Amás han estau imputadas un total de 142 personas, 10 falsos pais y os suyos 132 suposaus fillos. A investigación ha estau realizada por a Unidat Contra os Retz d’Immigración y Falsedatz (UCRIF) d’a Brigada Provincial d’Extranchería y Buegas d’a Chefatura Superior de Policía d’Aragón.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.