INAEM, CREA y CEPYME alcuerdan fomentar a inserción laboral en personas con discapacidat

Con iste convenio se quiere espardir entre os interpresarios aragoneses as actividatz economicas desembolicadas por os centros especials d'emplego y a suya capacidat de producción

O consellero d’Economía y Emplego d’o Gubierno d’Aragón, Francisco Bono, o president d’a Confederación d’Interpresarios d’Aragón, Jesús Morte y o president d’a Confederación d’Interpresarios d’a Chicota y Mediana Interpresa d’Aragón, Aurelio López d’Hita, han sinyau un convenio de colaboración destinau a espardir as actividatz economicas d’os centros especials d’emplego entre o teixiu empresarial aragonés y favoreixer vías de colaboración entre totz dos.

O convenio entre l’INAEM, CREA y CEPYME tien a finalidat de colaborar activament t’a consecución d’una serie d’obchectivos. En primer puesto, se pretende empentar a colaboración entre l’INAEM y interpresarios facilitando a transferencia d’información entre istas institucions y o desembolique d’accions conchuntas que contribuigan a la integración laboral d’as personas con discapacidat y a la millora de l’actividat economica d’os centros especials d’emplego.

Amás, se quiere amillorar a conoixencia d’os centros especials d’emplego en a sociedat aragonesa y, finalment, difundir entre os interpresarios aragoneses as actividatz economicas desembolicadas por os centros especials d’emplego en Aragón y a suya capacidat de producción y de prestación de servicios en diferents ambitos d’a economía, favoreixendo asinas as posibilidatz de colaboración entre totz dos.

A colaboración se concretará a traviés d’un conchunto d’actuacions tals como a planificación y execución de programas de difusión t’o desembolique de prochectos conchuntos como, por eixemplo, chornadas de difusión, edición de material divulgativo, campanyas de comunicación y correu directo con ninvio d’información a fin d’espardir os esquimens y avantallas d’a colaboración interpresarial con os centros especials d’emplego.

Tamién s’ha proposau o refirme y intercambeo d’información y de procedimientos en qüestions relacionadas con l’actividat d’as entidatz sinyants en temas d’integración laboral de personas con discapacidat, con especial atención a las necesidatz d’o sector interpresarial d’Aragón.

Atro d’os aspectos esencials de l’alcuerdo consiste en fomentar a participación coordinada en quantas actividatz se programen por qualsiquiera d’as entidatz quan vaigan dirichidas a incrementar a conoixencia d’os centros especials d’emplego y a estimular y favoreixer a colaboración d’o teixiu interpresarial aragonés con ditos centros.

Os sinyants d’o present convenio, que tien una duración anyal, se comprometen, entre atras accions, a colaborar con as interpresas y dar visibilidat a dita colaboración, metendo os meyos de publicidat adequaus (e-mail, pachina Web, memorias d’actuación, presentacions publicas, etc.) ta informar a distintos segmentos de publico (atros sectors, usuarios, institucions) y a la sociedat en cheneral, d’a iniciativa de colaborar con os centros especials d’emplego.

Fuent: http://www.aragon2.com/n-20004-702-INAEM_CREA_CEPYME_acuerdan_fomentar_insercion_laboral_personas_discapacidad

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.