India, en momentos d’acotolar a polio gracias a la vacunación

Fa tres anyos que no se conoixe garra nuevo caso

Imachen d'una campanya d'Unicef contra a polio (Foto: Unicef)

Imachen d’una campanya d’Unicef contra a polio (Foto: Unicef)

Iste marzo, si tot contina como dica agora, India habrá acotolau oficialment a polio d’o suyo territorio. Lo ferá dimpués de tres anyos sin garra caso rechistrau d’ista malotia y d’una fura campanya de vacunación, centrada en as personas más vulnerables. A Organización Mundial d’a Salut, certificará iste marzo, l’acotole d’iste virus que enriste o sistema niervoso central y puet causar paralisi irrevesible.

O proceso ye estau largo y dificil. En 2009 encara se rechistroron en a India quasi a metat de nuevos casos de tot lo mundo: 741 de 1604, seguntes informó Unicef. Se creyeba que sería o zaguer país en acotolar a malotía. O zaguer caso se rechistró en chinero de 2011 en una nina de 18 meses que, dimpués d’o tractamiento, ha conseguiu amillorar a-saber-lo.

Una inversión d’o gubierno de 1,8 millons d’euros dende 1995, ha permitiu meter 172 millons de vacuna a menors de 5 anyadas, con o treballo de 155.000 profesionals d’a medicina. O proceso manimenos no rematará encara. A partir d’o 2015 a vacuna se prencipiará a administrar por incheccions en cuenta de por gotas, como se fa agora. Un d’os retos que concara o programa ye plegar en lugars en puestos muito aluenyaus d’as ciudatz y de dificil arribar.

A OMS y Unicef teneban como obchectivo acotolar ista malotía en 2012 en tot lo mundo, lo que encara no s’ha conseguiu. En 2013 bi habió 148 casos nuevos en Afganistán, Nicheria y Pakistán, países con focos endemicos y 224 en atros países no endemicos como Somalia, Siria y Kenia. En Pakistán, antimás, os treballadors d’a vacunación ha sufriu tiros de man de hombres armaus, morindo-ne bellas decenas.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.