Indignación debant d’o futuro d’o lugar de Tiermas

Qualques organizacions demandan a reversión d'o lugar de Tiermas a os suyos antigos vecins

TIERMAS-300x225

Foto: Purna

Os vecins y vecinas d’o lugar de Tiermas (comarca d’a Chacetania) son en luita por recuperar o suyo lugar y as suyas tierras que les estioron arrampladas por a fuerza en os anyos 50 d’o sieglo pasau por a construcción de l’entibo de Yesa. Tiermas yera un lugar muit prospero y yera o que vertebraba o teixiu socioeconomico d’a zona. Dimpués d’a suya expropiación forzosa por parti d’a CHE os suyos vecins se veyioron obligaus a emigrar y parti d’o lugar, a que se trobaba a canto d’o río Aragón, quedo afogada baixo as auguas.

As primeras expropiacions se realizoron en 1929, con a dictadura de Primo de Rivera, pa reprener-se en l’anyo 1947, y finalizar-las entre os anyos 1959 y 1962. Os vicos d’as casas d’Eso, o vico d’os Banyos y Aringo yeran destinaus a estar engaronaus asinas como as millors tierras que suposaban o sustento pa os habitants de Tiermas.

En 1965 a CHE traspasó a propiedat a o Patrimonio d’o Estau, y iste cedió a zona urbana y rustica de Tiermas a la Diputación de Zaragoza, qui facilitó, en os anyos 80, con una subvención a suya compra a o concello de Sigüés de 140 casas, a muralla medieval, a ilesia, escuela, carreras y plazas, de conchunta con 29 hectarias de terreno y o camping existent, tot ixo por una cantidat simbolica, uns tres millons de pesetas, cifra que d’haber estau posible podrían haber asumiu os antigos propietarios.

En iste sentiu, Aturando Yesa y Purna recuerdan que as casas d’o lugar que se salvoron d’a inundación han sufriu o paso d’o tiempo y l’ixubliu d’as institucions que no se’n han feito por o mantenimiento d’o mesmo. “Encara hue, recorrer as suyas carreras te fa imachinar con tristura que abe anyos yera un lugar pleno de vida”. L’impacto que suposó a expropiación de Tiermas estió enorme ya que, de conchunta con Tiermas, desapareixioron tamién os lugars de Ruesta y Escó “deixando a la zona despoblada y ixarrallando a suya actividat economica, a rica agricultura en as marguins de l’Aragón. A día de hue a zona sigue sin recuperar-se-ne y sigue menazada por o prochecto de recreiximiento de l’entibo de Yesa” apuntan.

As tierras y o lugar de Tiermas han iu pasando de man en man, d’a CHE a la DPZ y d’a DPZ a o Concello de Sigüés. “O Concello de Sigüés, de conchunta con o suyo alcalde, Daniel Salinas, compró o lugar integrament con una subvención d’a DPZ de 22.000 euros. Agora, tienen previsto de fer un ‘pelotazo’ urbanistico por medio d’a construcción d’una urbanización de 250 casas y un balneario por valor de mas de 90 millons d’euros ixarrotando pa ixo o nuclio urbano de Tiermas” denuncian as organizacions.

Aturando Yesa y Purna sinyalan que “as antigas vecinas y vecins quieren recuperar o suyo lugar, quieren tornar a habitar-lo y construir un futuro en Tiermas. No se tracta d’un caso singular sino que ya s’ha dau con atros lugars como Lanuza u O Pueyo de Tena an que han tornau os suyos antigos vecins y han feito reviscolar os suyos lugars”.

“Nusatras creyemos en un modelo sostenible que respecte o territorio. Creyemos en un Aragón rural con lugars vivos y o dreito a vivir en ells de forma digna. Refirmamos os lugars que defienden a suya tierra, conscients que a defensa d’o territorio ye imprescindible pa la construcción d’una realidat social mas chusta, igualitaria y sostenible. A tierra perteneixe a os lugars que la treballan y que viven d’ella y no debe estar sozmesa a intreses especulativos” apostillan. Por ixo todas dos organizacions “nos solidarizamos y refirmamos a os vecins de Tiermas y nos oposamos de forma frontal a o prochecto d’a urbanización asinas como a qualsiquier atro prochecto que afecte a la integridat de Tiermas. Exichimos a devolución decamín d’o lugar a os suyos vecins en as condicions que calgan pa la suya habitabilidat asinas como a devolución d’Escó y Ruesta a os suyos antigos vecins”.

CHA levará a o Congreso a petición de reversión d’o lugar de Tiermas a os suyos antigos habitants

Por a suya parti, CHA recuerda que a reversión a os suyos antigos propietarios ye una qüestión de chusticia, como ya s’ha feito con exito con atros lugars como Lanuza, Saqués, u totz os afectaus por o falliu prochecto d’entibo de Chanovas.

“A Confederación Hidrografica de l’Ebro que estió l’administración propietaria inicialment le ha vagau, dende 1992 que se creyó l’Asociación pro-Defensa de Tiermas, pa haber escomencipiau un proceso de negociación entre os actuals propietarios, o Concello de Sigüés, y os antigos propietarios pa revertir a lo menos o casco antigo d’o lugar a istos, con a finalidat d’a suya vuelta a la vida” sinyala CHA.

Pa José Ramón Ceresuela, Secretario Territorial de l’Alto Aragón, “ye vergüenyoso que se les charre a os antigos propietarios de vendas voluntarias quan o proceso yera amparau en una lei franquista de 1954 d’expropiación forzosa y en un contexto d’ausencia d’Estau de Dreito y de libertatz”.

En caso de venda d’un bien expropiau, os antigos propietarios habrían de tener prioridat a la hora d’adquirir-lo, por una qüestión de chusticia y pa privar “prochectos especulativos”, que “poco han de veyer con a rehabilitación d’o lugar”, como o que menaza Tiermas.

Por tot ixo van a preguntar a o Gubierno d’Espanya o porqué en o caso de Tiermas no s’afavoreixe un proceso de reversión semellant a o de Lanuza, Saqués u Chanovas.

Fuent: http://arainfo.org/2013/07/indignacion-ante-el-futuro-del-pueblo-de-tiermas/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.