Indignación y mofla por a proposición d’o PP que diz que o valenciano viene de l’iberico

Os partius d'a oposición y l'AVL la critican con dureza

Parlamento valencianoA proposición no de lei presentada por o PP, que quiere que a Reyal Academia Espanyola reconoixca o valenciano como luenga no catalana, asegurando que o valenciano ye una evolución d’o luengache iberico, causó indignación y mofla entre os partius d’a oposición. Compromís aseguró ahiere que trahiería o texto a os tribunals si se tramitaba; o PSPV lo calificó ‘de faltada a la intelichencia’ y EUPV  l’atribuyó a una intención desasperada de querer dispertar viellas pantasmas superadas, como a batalla de simbolos. Mesmo l’Academia Valenciana d’a Luenga (AVL) se remitió a o dictamen (pdf) que publicó en 2005, en que avalaba a unidat d’a luenga.

Compromís: ‘Ye una mofla y una ofensa a l’Academia Valenciana d’a Luenga’

Seguntes o “síndic” de Compromís, Enric Morera, ‘o texto que ha presentau o PP ye manifestament ilegal, porque se blinca a lechislación y as institucions normativas y, o pior de tot, contrimuestra que quiere trahier a suya luita electoral a la guerra d’os simbolos, quan en istos momentos a sociedat valenciana amenista un gubierno fuerte y que dé respuestas’. Considera que a proposición no de lei ‘ye una mofla y una ofensa a l’Academia Valenciana d’a Luenga‘, que ye l’organismo que marca a normativización d’a luenga y que, en un dictamen (pdf) de 2005, avalaba a unidat d’a luenga catalana. Morera avisó ahiere que os diputaus que votasen a favor d’o texto incurrirían en un delito de prevaricación. ‘O PP se troba comodo en un conflicto superau por a gran mayoría d’os democratas valencianos y que, con ixos debatz, nomás quiere creyar divisions socials y perchudicar a normalización y uso d’a nuestra luenga.’

PSPV: ‘Faltan a la intelichencia d’os ciudadanos’

Ximo Puig, secretario cheneral d’o PSPV, considera que ‘a desasperación d’o PP’ leva a o partiu ‘a quitar viellas pantasmas d’o pasau, en un momento en que un tercio d’os diputaus d’as Corts son encausaus‘. Puig, que ahiere dició que s’habría de demandar a opinión scientifica a l’Academia Valenciana d’a Luenga, define como ‘desproposito’ a proposición d’o PP: ‘Contrimuestra que les importa muit poco o futuro d’os valencianos y valencianas, que en istos momentos tienen un 30% d’ature, d’exclusión social y de deuda. A suya irresponsabilidad abanza en marcha triunfant.’ Tamién dició que a proposición obedeixeba ‘a la intención d’apartar a o pueblo d’a verdat, practica que dimpués de dos decenios de gubierno d’a dreita ha traito a o País Valenciano a la situación actual’. Seguntes Puig, ‘ta prebar de desplazar ista qüestión, faltan a la intelichencia d’os ciudadanos quitando cosas tant absurdas como istas’.

EUPV: ‘U se’n tornan t’a escuela u se’n van ta casa’

En una linia pareixida, o diputau d’EUPV, Lluís Torró, sinyaló que os valencianos no se mereixeban ‘estar gubernaus por un partiu que torna a prencipiar a batalla d’os simbolos y d’a luenga, con una finalidat exclusivament electoralista’. Y adhibió que l’unico que pretendeba o PP yera ‘dividir una vegada mas a sociedat valenciana‘. ‘A proposa d’o PP ye de raso ascientífica, irracional y ahistorica; no tien cosa a viyer con os conoiximientos plenament normalizaus d’a filolochía y d’a historia d’a luenga. Por tanto, u se’n tornan t’a escuela, dimpués de deixar previament o gubierno en mans de personas con mas cultura, u bien, si saben que mienten, se’n van ta casa suya, que ya ye prou’, dició.

Fuent: http://www.vilaweb.cat/noticia/4127067/20130620/indignacio-burla-proposicio-pp-diu-valencia-ve-liberic.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.