Intensa chornada de luita d’a mineria aragonesa, con talles de carretera y concentración en Andorra

2000 presonas s'han manifestau en Andorra contra as midas d'o gubierno espanyol t'o sector d'a minería

Os mineros han prencipiau a chornada tallando a N-232 (Foto: La Comarca)

Os mineros han prencipiau a chornada tallando a N-232 (Foto: La Comarca)

Contina a vada en as cuencas mineras aragonesas ta protestar contra o retalle d’o presupuesto d’o sector ta iste anyo 2012, de mas d’un 60%. Mientres tot o diya, as cuencas mineras han viviu a saber los actos de luita que han prencipiau de maitín con o talle d’a carretera N-232 a o suyo paso por Andorra. A nueva chornada tamién ha trancau de raso totas as explotacions, como paso ahiere, no nomás en Aragón, que tamién en atras zonas mineras de l’estau como Asturias. O talle d’a carretera ha prevocau retencions en o tramo, pero no han habiu incidents grieus. Ta par d’a 1 d’o meyodía a Guardia Civil espanyola ha rematau de forachitar os repuis d’os contenidors y ruedas cremadas y ha ubierto completament o tramo de carretera.

O futuro d'as cuencas mineras (Foto: Julián Buey)

O futuro d'as cuencas mineras (Foto: Julián Buey)

Ya de tardis, os alcaldes d’os 16 concellos afectaus por as midas d’o gubierno espanyol s’han trobau en Andorra, y dimpués, una manifestación, a la que han asistiu más de 2000 presonas, ha recorriu a capital d’a redolada Andorra-Sierra d’Arcos ta reclamar que no se retallen as aduyas t’o carbón y que no se metan en periglo os puestos de triballo afectaus, calculaus en más de 2000. As movilizacions d’a mineria aragonesa han contau con o refirme de totz os sindicatos, partius politicos y concellos afectau. Tamién dende o gubierno, como o conseller d’Industria, Arturo Aliaga d’o PAR, y mesmo cargos publicos d’o PP, partiu que ha preso ista mida dende o gubierno d’Espanya.

As minas son gritadas ta fer dos chornadas mas de vada a semana venient, que tamién contestarán a las declaracions d’o ministro espanyol de Industria, José Manuel Soria, que ha tornau a insistir en a “necesidat de retallar 18 millons d’euros en as aduyas t’o sector d’o carbón y a minería”.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.