Interpol ordena a detención de 19 cargos franquistas

Rodolfo Martín Villa y José Utrera Molina entre os 19 cargos franquistas que s'ordena detener. Araba que a Policía espanyola los detenga, encara que serían detenius en o extranchero

Martín Villa, o segundo por a dreita

Martín Villa, o segundo por a dreita

A Interpol archentina ha emitiu una orden de detención contra 19 cargos d’a dictadura franquista dentro d’a investigación que a chueza d’o país sudamericano, María Servini, ye fendo sobre diversos crimens d’a dictadura espanyola. A sección archentina d’Interpol ha demandau “con urchencia” a la sección espanyola a detención preventiva con fins d’extradición d’estes excargos franquistas.

Interpol archentina demanda tanto a la chueza como a las autoridatz espanyolas os datos personals d’os investigaus pa que as policías de tot o mundo puedan identificar-los si salen d’o Estau espanyol pa proceder a la suya detención y evitar confundir-los con atras personas que puedan tener o mesmo nombre.

S’ordena a detención de Rodolfo Martín Villa, procurador en as Cortes franquistas dende 1961, gubernador civil de Barcelona entre 1974 y 1976 y posteriorment ministro con Adolfo Suárez con UCD y vicepresident primer d’o gubierno con Calvo Sotelo en 1982. Se le imputa a responsabilidat en l’asesinato a mans de disparos d’a policía de cinco treballadors vascos en Vitoria o 3 de marzo de 1976 mientres una protesta laboral. Actualment ye consellero d’o SAREB, conoixiu como “banco malo”.

Tamién s’ordena a detención de José Utrera Molina, suegro d’o exministro de Chusticia Alberto Ruiz Gallardón, por a sentencia a muerte a Salvador Puig Antich en 1974. Fernando Suárez, ministro de Treballo y vicepresident d’o gubierno en 1975 ye acusau por a suya responsabilidat en a pena de muerte a os zaguers fusilaus d’o franquismo en 1975, dos miembros d’ETA y tres d’o FRAP. Tamién i figura atros ministros y vicepresidents de gubiernos franquistas dica 1977, asinas como chueces y miembros d’a Policía Armada por muertes, desaparicions y torturas.

O ministro de Chusticia espanyol, Rafael Catalá, ha declarau que “s’ha d’estudiar esta orden d’a Interpol. Pero por os antecedents de l’Audiencia Nacional por ‘feitos similars’ estoi que a resolución será muit equivalent a la que i habió“. En ixa sentencia, l’Audiencia Nacional espanyola denegó a extradición de dos imputaus por torturas, Juan Antonio González Pacheco “Billy el Niño” y Jesús Muñecas Aguilar “Capitán Muñecas”. O ministro ha meso como argumentos pa ixa posible decisión a prescripción d’os delitos y a Lei d’Amnistía de 1977.

Ista lei preconstitucional ha estau criticada bella vegada por organismos internacionals como a ONU y organizacions de dreitos humanos que consideran que ye en contradicción con diversos tractaus internacionals de dreitos humanos. Amás trucan o ficacio en que os delitos de lesa humanidat como os citaus no prescriben nunca.

Asinas pues, araba que sigan detenius os imputaus por a Policía espanyola, que sí serían detenius en o extranchero.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.