IPCAF torna a denunciar a permisividat de Gustavo Alcalde con os actos d’extrema dreita en Zaragoza

A Iniciativa Popular Contra os Actos Faixistas (IPCAF) denuncia a permisividat de Gustavo Alcalde con un nuevo acto d'extrema dreita, coincident en día y puesto con o cabo d'anyo d'o 15M

nazis Liga Joven

Nazis de Liga Joven o pasau 20 d’abril en Zaragoza. Foto: AraInfo

Iste miercols 15 de mayo en a plaza d’o Pilar, o partiu ultracatolico Falange ha convocau una concentración baixo o lema “Por a familia tradicional, no a l’alborto”. Dende a Iniciativa Popular Contra os Actos Faixistas (IPCAF) declaran que “a convocatoria constituye un periglo ta la ciudadanalla, con antecedents violentos, como o pasau 13 d’abril, a on miembros d’iste grupo fotioron un batán a un choven africano”.

Ista iniciativa popular no comprende como o Delegau de Gubierno en Aragón, Gustavo Alcalde, permite a concentración de Falange, estando que ixe mesmo día en a plaza d’o Pilar se concentra o movimiento 15M ta celebrar o suyo segundo cabo d’anyo.

Dende a IPCAF han remarcau, en un comunicau feito publico ahiere, que “o lema d’a convocatoria de Falange atenta contra os dreitos d’as mullers”. En o comunicau, a IPCAF demanda “iniciativas y respuestas populars ta empachar que ista mena d’actos se continen realizando”.

Por os nuevos modelos de familia y o dreito a decidir. Desmontando a o faixismo

“Dentro d’a politica de retallos socials, politicos y economicos que somos sufrindo, consideramos que cal creyar uns argumentos solidos que nos permitan, con un discurso coherent, creyau dende o feminismo, esfender-nos y movilizar-nos frent a o prochecto de vida que se nos ofreixe a las mullers de refamiliarización, o control d’o nuestro cuerpo, a sexualidat, y o nuestro dreito a decidir” apunta o comunicau d’a IPCAF.

En iste sentiu IPCAF considera “no nomás un grau retroceso o que as condicions ta poder acceder a un alborto, a os metodos de prevención u una educación sexual de calidat que nos proporcione autonomía y placer sin periglo, desapareixcan u se degraden a o maximo, soque o que ye en chuego ye a no acceptación d’os abances d’as mullers sobre a suya propia sexualidat, a suya capacidat de decisión, as diferents trazas de vivir y entender a maternidat y a crianza. O que se qüestiona ye l’autonomía d’as mullers: que deseyemos y vivamos aluenyando-nos d’a ideolochía que refuerza a familia tradicional y os alazetz d’o patriarcau”.

Bellas organizacions han solicitau a Delegación de Gubierno que viede a concentración de Falange

CHA, Chobentú y l’Asociación Amparo Poch sinyalaban “dos qüestions basicas que alazetan ista demanda”. Por un costau o caracter propio d’as concentracions y a ideolochía de Falange, con emplego d’emblemas y uniformes paramilitars y de caracter inconstitucional y por atro costau, que l’acto “contradiz a normativa vichent en materia d’esfensa d’a familia, os menors y a propia regulación de l’alborto existent en o nuestro ordenamiento churidico”.

Puyalón de Cuchas denunciaba que “a concentración de Falange enriste contra os dreitos y libertatz d’as mullers y atros modelos de familia” y adhibiba que “fan emplego de simbolochía anticonstitucional fendo servir habitualment simbolos franquistas en os suyos actos”.

A Coordinadera Antifaixista de Zaragoza afirmaba que “ista autorización suposa un periglo real y imminent” y recordaba, igual que a resta d’organizacions, o caracter violento d’istos grupos faixistas que mientres as zagueras semanas, han realizau bells actos, totz ells autorizaus. A Coordinadera creye que “debant d’os aclapadors indicios que vinculan os suyos actos con agresions, habrían de pensar-se dos vegadas autorizar-los”. Asinas mesmo, lanzoron un mensache d’alerta, “por enesima vegada”, afirmando que “Zaragoza se ye convertindo en un punto neuralchico d’os grupos faixistas, racistas, xenofobos y homofobos, y a sociedat aragonesa no ye o que quiere ni deseya”.

Fuent: http://arainfo.org/2013/05/ipcaf-vuelve-a-denunciar-la-permisividad-de-gustavo-alcalde-con-los-actos-de-extrema-derecha-en-zaragoza/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.