Israel mete en marcha una linia d’autobuses nomás ta palestins

Iste lunes prencipian a funcionar autobuses deseparaus ta chodigos y arabes

Muro feito por Israel (Foto: Wikipedia)

Muro feito por Israel (Foto: Wikipedia)

O Ministerio de Transporte d’Israel ubrirá una linia d‘autobuses nomás ta palestins entre o norte de Cischordania y Israel ta privar de que istos viachen en os que fan servir os pasachers israelis, informó iste domingo a depeixa dichital israeli Ynet. Dende o lunes, prencipia a funcionar ista nueva linia d’autobuses, destinada a transportar a los treballadors palestins que viachan totz os diyas dende o norte de Cischordania a traviés o puesto de control militar d’Eyal, amán de Qalquilya, en o centro d’Israel.

Seguntes han indicau a Ynet bells conductors d’autobús, encara que ells no tienen potestat ta empachar que os palestins se’n puyen t’os autocars d’a linia regular, se les ha informau de que en o cruce militar d’os soldaus les ordenarán de baixar-ne y puyar t’os nuevos transportes destinaus t’a población arabe. “No nos deixan negar o servicio y no ordenaremos a dengún que se’n baixe de l’autobús, pero, por lo que nos han dito, dende a semana venient, bi habrá controls en o puesto de control (militar) y demandarán a los palestins que se’n puyen t’os suyos propios autobuses”, declaró a Ynet un conductor de Afikim, a interpresa de transportes que tien a franquicia d’a zona.

“Totz chilarán que ye racismo y apartheid. Realment no pareix una cosa buena y puet estar que hesenos de trobar bella atra solución, pero a situación que bi ha agora mesmo ye insostenible”, adhibió o treballador. Encara que Transports asegura que a nueva linia fa parti d’o rete cheneral, nomás s’ha informau d’a suya existencia en os pueblos palestinos con pasquins escritos en arabe y no en as colonias chodigas en a mesma redolada de Cischordania.

Seguntes a depeixa dichital, o ministerio asegura que os nuevos autobuses tienen como obchetivo que no rebutan tanto as linias emplegadas por chodigos en ista redolada y esfiende o plan decindo que bi ha habiu protestas por a tensión y barallas entre os pasachers aragbes y chodigos.

As nuevas linias, asegura Transportes, “no son linias deseparadas ta palestins”, sino que preban d’amillorar os servicios ufiertos a los treballadors palestins y reemplazar “linias irregulars, piratas, que cobran pres muito caros t’os pasachers palestins”, antimás de achiquir a conchestión, lo que será bueno tanto ta palestins como ta israelis”. Sobre as intruccions de no deixar que os palestins viachen en os autobuses endrezaus ta chodigos, Afikim ha sinyalau que “ista pregunta le’n has de fer t’os cuerpos de seguridat“.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.