Ista semana s’inicia o chudicio contra Victorino Alonso por a destrucción d’a espelunga de Chaves

Ecolochistas en Acción, que actuará como acusación particular, solicita una indemnización de 50,9 millons d'euros y dos condenas de tres anyos de prisión cadaguna

Estau d'Espelunga Chaves

Estau d’a espelunga de Chaves (Foto: Apudepa)

Os días 21, 22 y 23 de setiembre -mierques, chueves y viernes-, tendrá puesto o chudicio sobre as responsabilidatz penals derivadas d’a estrafalla d’a espelunga de Chaves en a Sierra de Guara. Ya han pasau siet anyos dende que se conoixese a destrucción d’iste chacimiento neolitico, considerau como un de totz dos mas importants d’a peninsula Iberica, dimpués d’a intervención de dos empresas d’o grupo d’o empresario minero Victorino Alonso, prencipal imputau d’iste “grieu atentau contra o patrimonio”, recorda Ecolochistas en Acción, que actuará como acusación particular.

A primers d’o 2009, dimpués d’a visita de Vicente Baldellou —director d’as excavacions arqueolochicas que se veniban desenrollando entre mas de 30 anyos en l’interior d’a cueva— se fació publico que heba estau arrasau tot o libel neolitico (y parte d’o paleolitico) por maquinaria pesada. “A espelunga de Chaves yera, chunto a la Cova de’l Or d’Alicant, o mas important chacimiento neolitico d’a peninsula Iberica. Parando cuenta en que encara faltaba por estudiar mas d’o 90% d’o suyo espacio, o danyo causau ye incalculable y suposa un atentau contra o patrimonio historico de primer orden”, denuncia a organización ecolochista.

O chacimiento se trobaba en una finca cinechetica encletada en o Parque Natural d’a Sierra y Canyons de Guara. Dende o primer momento, asociacions como Ecolochistas en Acción apuntaban a Victorino Alonso, a qui se le relaciona con a compra de dita finca, como prencipal responsable d’a estrafalla. Entre o mesmo periodo en que se realizó a demolición d’a espelunga “s’heba rechistrau grans obras sin autorización con maquinaria provenient d’a construcción de l’aeropuerto Uesca-Pirineus, en que i heba participau empresas d’o grupo de Victorino Alonso en a UTE constructora”. Istas obras causoron danyos importants a las valors d’o espacio protechiu d’a Sierra y Canyons de Guara y fuoron denunciadas sistematicament por Ecolochistas en Acción, sin que as administracions competents plegasen a intervenir. A organización ecolochista treballa pa que os danyos causaus en o Parque Natural s’incluigan en a causa chudicial chunto a os cometius contra o patrimonio cultural.

Dimpués d’as dilichencias previas que s’han iu realizando mientres istes anyos gracias a o treballo d’as acusacions particulars d’Apudepa (Acción Púbica pa la Defensa d’o Patrimonio Aragonés) y Ecolochistas en Acción, s’ha aconseguiu a imputación d’o empresario Victorino Alonso, conoixiu tamién por atros procesos chudicials por destrucción d’o patrimonio publico y medioambiental en diferents puntos d’o Estau. O equipo churidico d’Ecolochistas en Acción ha veniu solicitando entre as dilichencias chudicials por a estrafalla d’a espelunga de Chaves una indemnización de 50,9 millons d’euros y dos condenas de tres anyos de prisión cadaguna.

Coincidindo con o inicio d’o proceso oral, s’ha convocau una concentración a las puertas d’os chudgaus de Uesca o mierques 21 dende as 9.00 horas. Ecolochistas en Acción fa un clamamiento a la participación en a concentración y a o seguimiento d’o chudicio que tendrá puesto mientres a semana pa que a espelunga de Chaves no quede sepultada en l’olbiu.

Fuent: http://arainfo.org/109091-2/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.