Iste domingo se celebra o Diya d’a exaltación d’o trache ansotano

Atro anyo se celebra a fiesta d'o Diya d'a exaltación d'o trache ansotano que fa a 43 edición

Traches ansotanos. Foto: Père Igor (CC-BY-SA)

Traches ansotanos. Foto: Père Igor (CC-BY-SA)

Como cada anyo, o zaguer domingo d’agosto se celebra en Ansó o Diya d’a exaltación d’o trache ansotano, que ista anyada fa a 43 edición. Dica fa no tanto encara se podeba veyer a os habitadors d’ista población con o trache tipico. Dica 1930 a mayoría lo vestiban, y dica 1987, María Mendiara encara lo portaba, y dica 1997 Jorge Puyó. Dende allora dengún no lo viste de contino.

Ista fiesta empecipió en 1971 a iniciativa d’o Concello d’Ansó pa fer homenache d’os traches tipicos ansotanos. Dende 1994 ye fiesta d’intrés turistico aragonés, y en 2011 o Ministerio d’Industria y Turismo espanyol la declaró tamién fiesta d’intrés turistico por a suya valor etnolochica y cultural.

O diya prencipiará a las 9 d’o maitín con cullarada de migas y vin en a carretera d’acceso a la localidat pa recibir a las visitants, con totz os vecins y vecinas vestidas con o trache ansotano. Una hora mas tarde, se scenificará costumbres tipicos ansotanos acompanyaus de mosica tradicional. Contino, l’alcalde ferá a bienvenida y s’entregará o Galardón d’Agradeiximiento en a Casa d’a Villa y se ferá a presentación d’os traches en a Pza. Domingo Miral. A las 12:45 h. se ferá misa, cantada por a Coral Ansotana, pa rematar en o pasavillas por as carreras d’o municipio, do se tornará a scenificar costumbres cotidianos. A las 14:30 bi habrá chenta y a las 17:30 se despide a chornada con l’actuación mosical d’o Grupo de Danzas d’Isaba “Kurruskla”.

Cal comentar que en a Casa Pirinenca d’o Parque José Antonio Labordeta de Zaragoza bi ha una exposición etnolochica de vestimenta dica cabo d’anyo con un zarpau de traches tipicos ansotanos.

Una rispuesta a Iste domingo se celebra o Diya d’a exaltación d’o trache ansotano

  1. Pingback: Iste domingo se celebra o Diya d’a exaltación d’o trache ansotano | AraInfo | Achencia de Noticias d´Aragón

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.