Italia concara un resultau electoral indescifrable

Mario Monti salindo de votar (Foto: eldiario.es)

Mario Monti salindo de votar (Foto: eldiario.es)

A cucha italiana ha conseguiu una victoria que no’n ye prou en as urnas. A suya probable y extraordinariament achustada mayoría en a Cambra Baixa se combina con una victoria d’a coalición de Berlusconi en o Senau y un reparto de fuerzas que fa imposible formar un Gubierno estable.

Por dencima de Pier Luigi Bersani y Silvio Berlusconi creix a figura de Beppe Grillo, l’artista que odia a los politicos tradicionals y que con un 25% d’os votos ha feito que o Movimiento Cinco Estrelas siga o partiu más votau d’Italia. En o recuento final d’a Cambra Baixa, será superau por as coalicions que menan Bersani y Berlusconi, pero o suyo porcentache indica que lo mensache suyo, siempre aparatero, ha chupiu a una opinión publica cansa d’una casta politica que no ha renunciau a os privilechios suyos en un país a on que os politicos tienen chornals muito superiors a los cutianos en Espanya.

Os primers sondeus en zarrar-se as urnas dioron una victoria esclatera d’a cucha en a Cambra Baixa (que de traza automatica da o 55% d’as cadieras t’a fuerza ganadora), pero l’escrutinio fue achustando a esferencia dica plegar en as quatre decimas pasada la meya nueit. Bersani se dio por ganador en un mensache en Twitter, pero o secretario cheneral d’o partiu de Berlusconi demandó que no se desen por oficials os resultaus en estar tan radida la esferencia.

O PD de Bersani tenió o 29,5% en a Cambra Baixa. Berlusconi plegó en o 29,1 %, Grillo en 25,5% y a coalición de Monti, en o 10,6%. O primer ministro salient se quedó muito luen d’o ran que le predeciban os sondeus. O tecnocrata destinau a tranquilizar a Alemanya y a Comisión Europea no cumplió a misión que l’heban dau.

Con o escrutinio quasi rematau, Berlusconi controlaba 114 cadieras en o Senau, nomás uno más que o centrocucha. Grillo tendrá 58 senadors y Monti, 16. Pero a prochección feita por os meyos daba un atro chiro de zaguer hora. S’aspera que Bersani consiga 123 senadors, por 118 de Berlusconi. Con tot y con ixo, Bersano no tien mayoría ta controlar o Senau, sisquiá con o ya inutil refirme de Monti.

“Italia ingubernable”, titolaba a ixa hora la web de La Reppublica. Muitos politicos y analistas aventuraban que una nueva convocatoria electoral en no guaire tiempo ye inevitable. Grillo no tardó guaire tiempo en desmarcar-se de qualsiquier combinación. Dició que a unica solución posible yera una alianza, improbable d’atra man, entre Bersani y Berlusconi. Yera una traza de decir que no contasen con ell ta garra alcuerdo de gubierno.

Berlusconi anunció que ye disposau a considerar un alcuerdo con o centrocucha t’aprebar bellas leis, pero descartó formar un Gubierno de gran coalición. Fa bells pocos meses, Bersani teneba 15 puntos más en as encuestas y quasi tot lo mundo daba a Berlusconi por muerto. Sigan u no viables, as suyas promesas de achiquir os impuestos, y mesmo de tornar cantidatz ya pagadas, facioron o miraglo, u talment estase que o ex primer ministro no ha perdiu a suya extranya conexión con a clase meya italiana. Lo que no se’n puet dubdar ye que a suya campanya “antialemana” y contra l’austeridat estió aplaudida por un electorau que tien medrana d’o futuro.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.