IU critica que se zarren as urchencias de Sagasta, en Zaragoza

A portavoz Patricia Luquin esfiende que ista mida no fa cabidar diners

Patricia Luquin

Patricia Luquin

A colla parlamentaria de IU en Aragón, ha refusau a “penible decisión d’o Departamento de Sanidat, menau por Ricardo Oliván”, qui han decidiu de zarrar o Servicio de Urchencias de Atención Primaria d’o Centro de Salut Muñoz Fernández (C.S. Sagasta) de Zaragoza. “Una mida que suposa, y en van quantas, atra enrestida más ent’a santidat publica y  a l’atención primaria”, denuncia la portavoz parlamentaria de IU Patricia Luquin, qui remera que a suya formación politica se oposa de tot a zarrar-las, más que más, en estar o unico servicio de urchencias d’atención primaria de Zaragoza.

No ye verdat que ista mida faiga cabidar diners y siga más eficaz, como “nos vende” o conseller”, critica Luquin, remerando que “iste servicio naixió chusto con a ideya de cabidar diners y asumir ixas urchencias que se podeban atender dende l’Atención Primaria”.

En un comunicau, os Servicio d’Urchencia d’Atención Primaria de Zaragoza dicioron que “se preba de sacar un servicio que funciona, pues atiende más de 8.000 pacients en una anyada en o turno de nueitz con a dotación d’un celador/a, un enfermer/a y un medico/a”. “Antimás de fer honra ta que no rebutan as urchencias hespitalarias, ha feito que no siga tant grieu o, zarre de consultas d’Atención Primaria en tiempos de vacanzas como en o Nadal, Semana Santa u puents y atras festividatz” adhiben. Remeran tamién que china chana “s’ha baixau a cantidat de personal achustau ta sustitucions en Atención Primaria, lo que ha feito que puyasen as listas d’apera dica una semana en os centros de salut”.

A portavoz de IU remata decindo que “Cada vegada ye más cutiano trobar-nos con titulars que denuncian a saturación d’as urchencias hespitalarias, que ya no aduben con os casos, creixendo os tiempos d’aspera y o gasto economico, debiu a os suyos protocolos, que ye lo que suposa que s’atiendan ista mena d’urchencias dende Atención Primaria”.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.