IU demanda a Aliaga que refirme as milloras d’o poligono industrial Cuencas Meneras

Izquierda Unida presienta una iniciativa ta que o Gubierno financie con cargo a las linias d'aduya d'Industria as reformas que calga t'o buen funcionamiento d'o poligono

Luis Angel Romero en as Cortes

Luis Angel Romero en as Cortes

A colla parlamentaria de IU ha demandau a lo Gubierno d’Aragón que financie con cargo a las linias d’aduya d’o Departamento d’Industria y Innovación (incluyidas las d’o Fundo d’Inversions de Teruel), as obras de millora d’o Poligono Industrial comarcal Cuencas Meneras.

A propuesta, que s’ha feito en a Comisión d’Industria y Innovación d’as Cortz a traviés d’una Proposición no de Lei, demanda que se rematen as reformas “que calen t’o desembolique y buen funcionamiento d’as interpresas que bi ha en ista infraestructua industrial, que i aculle a dotze interpresas, todas ellas pymes d’a redolada y la ITV comarcal, y a on que treballan más de 60 personas”, como ha explicau Luis Ángel Romero, portavoz de IU. 

Dende a formación de cuchas remeran que a comarca presentó a lo Conseller d’Industria, Arturo Aliaga, un prochecto de 380.000 euros “ta fer lo imprescindible”. Seguntes a Comarca, caldría dos u tres fases. T’a primer ferían falta 90.000 euros t’apanyar os problemas con a potabilizadora y d’as auguas de plevia d’o Poligono Industrial.

En a visita que fació o conseller o pasau febrero, os representants d’os interpresarios y d’a comarca le facioron saber d’as deficiencias que teneba o poligono industrial. “As pymes consideran que cal apanyar os problemas que bi ha ta que puedan atrayer a futuras interpresas y millorar lo desembolique d’as que, a tamás de tot, resisten y continan con as puertas ubiertas”, informa Romero.

“Han pasau qualques meses y no tenemos constancia de que o Departamento d’Industria haiga preso as midas que calen ni haiga encetau o plan que presentó a Comarca Cuencas Meneras”, sinyala o portvoz de IU. “A iniciativa s’ha presentau ta que o Gubierno ascuite a los achents economicos y socials y atienda las suyas demandas con un plan que solucione os problemas que bi ha y guarencie a continidat y futuro d’iste poligono”.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.