IU demanda a lo Gubierno d’Aragón que cumpla os alcuerdos que i plegó con a plataforma ‘Al Jiloca ya le toca’

Demandan un plan de desembolique t'a redolada.

Foto: Al Jiloca ya le toca

Foto: Al Jiloca ya le toca

Izquierda Unida levará t’as Cortz d’Aragón as reivindicacions d’os ciudadans y os achents socials d’o Xiloca y, ta ixo, presentará en a Comisión d’Industria y Innovación d’iste venient martes una Proposición no de Lei. Astí, IU demanda a l’Executivo aragonés que faya un Plan de desembolique urchent ta ista redolada, liderau por o propio Gubierno y con a participación d’as entidatz locals, la comarca, la Diputación y los achents socials. “Un plan que permita la coordinación d’os diferents instrumentos financiers propios d’o Gubierno ta favoreixer a plegada de nuevas interpresas y a creyación d’emplego parando cuenta d’o manifiesta d’a Plataforma en Esfensa d’a comarca d’o Xiloca”, esplanica o portavoz d’Industria de IU en as Cortz, Luis Ángel Romero.

Cal remerar que a comarca de Xiloca ye un territorio que sufrió en os 70 as conseqüencias d’o esvoldregue d’a minería de fierro de Uellos Negros y a zucrera de Santa Olalia y, más recient, o cierre d’o matader de Mont-Reyal y a baixa actividat en o de Calamocha, antimás d’a crisi economica que traviesa Aragón.

En iste scenario, os interpresarios y comerciants d’o Xiloca, a traviés de l’Asociación d’o Comercio y a Industria de Calamocha (ACIC), han denunciau l’albandono institucional que sufre a comarca y han presentau una propuesta de reactivación economica. Tamién han constituyiu una Plataforma Ciudadana ta reivindicar os compromisos presos por as institucions, más que más, o Gubierno d’Aragón y, baixo lo lema “A o Xiloca, ya le pertoca” han presentau una campanya explicativa y de replega de firmas en totz os lugars d’a redolada que preba de concienciar a los ciudadans d’a situación que traviesa la redolada y en esfensa d’os municipios que’n fan parti,

Debant d’ista situación, Izquierda Unida incluye en un segundo punto en ista iniciativa a la Sociedat Publica t’o Desembolique de Calamocha, S.A., que perteneixe a la Corporación Interpresarial Publica de Aragón SLU, d’o Gubierno d’Aragón, qui tien o 80% d’as suyas accions y o Concello de Calamocha o 20% que’n queda.

“Demandamos a l’Executivo que empente ista Sociedat Publica, agora albandonada dende l’anvista d’a chestión y consecución d’os suyos obchectivos, ta recuperar a suya actividat de promoción d’a economía y l’emplego enamplando los recursos economicos, tecnicos y humanos a traviés d’a Corporación Interpresarial Publica d’Aragón, SLU, y con ixo, fer efectivos os obchectivos d’ista iniciativa”, informa Romero.

“Ye hora d’exichir a l’Executivo PP-PAR que ascuite as reivindicacions d’o Xiloca y execute os alcuerdos que plegó con os ciudadans y os achents socials con midas que empenten o desembolique economico y industrial y a creyación d’empelgo en ista comarca”, remata.

 

Fuent: http://arainfo.org/2013/11/izquierda-unida-reclama-al-gobierno-de-aragon-que-cumpla-los-acuerdos-alcanzados-con-la-plataforma-al-jiloca-ya-le-toca/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.