IU denuncia falta de planificación en a chestión d’as residencias publicas ta mayors

Denuncian a falta de planificación en as tretze residencias publicas ta mayors que penden d'o Departamento de Sanidat, Bienestar Social y Familia

Patricia Luquin, diputada de IU (Foto: IU)

Patricia Luquin, diputada de IU (Foto: IU)

Izquierda Unida (IU) ha demandau a o conseller de Sanidat, Bienestar y Familia, Ricardo Oliván, explique a planificación d’o suyo Departamento en relación con as Residencia Publicas de personas mayors. A coalición creye que podría estar pensando en zarrar u privatizar-ne.

O gubierno conta con tretze residencias ta mayors de chestión publica dreita en tot lo país. A portavoz de Sanidat de IU en as Cortes, Patricia Luquin, remera que, en o caso d’a Residencia Turia de Teruel, han teniu conoiximiento “d’a decisión de zarrar-la y trasladar a las y los usuarios t’a Residencia Javalambre, a tamás d’a gran oposición que ha teniu que se zarrase y se trasladase a la chent que bi yera”.

“D’atra man, – contina la diputada – a Residencia de Movera tamién se ye inspeccionando y tanto las y los usuarios como a población d’a redolada  son en una situación de que no saben o qué pasará con o centro”. “Igualment pasa con a Residencia d’o Pinar y asinas podríanos continar con cadaguna d’as tretze residencias” – diz Luquin.
T’a parlamentaria, “todas istas noticias y actuacions fan sensación d’improvisación de man d’o Departamento de Sanidat, Bienestar Social y Familia, y lo que ye más preocupant, pareix que no existise una planificación esclatera y concreta cuanto a las Residencias Publicas de Mayors, yq ue no se sabe exactament que pasará con cadaguna”. “Creyemos que cal que bi haiga una planificación esclatera de man d’o Departamento y que se guarancie a los usuarios si continarán ubiertas, si continarán estando de chestión publica, qué pasará con las y los treballadors d’os centros y que se conoixcan as previsions y/u alternativas”.

IU ha rechistau bellas preguntas endrezadas t’o conseller ta que les informe d’a suya planificación cuanto a las residencias, a on que aclare si tien previsto que continen ubiertas y con chestión y titularidat publica. En caso de que no, demandan conoixer que residencias se zarrarían u se cambiaría la chestión dreita por “atra mena de chestión”.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.