IU exiche a Educación que achuste a los interinos o 1 de setiembre

O Chusticia esfiende que as midas d'Educación perchudican a o profesorau y a l'alumnalla

Adolfo Barrena, portavoz de educación de IU (Foto: IU)

Adolfo Barrena, portavoz de educación de IU (Foto: IU)

A Colla parlamentaria de IU ha instau a lo Departamento d’Educación a que achuste a lo personal interino t’o curso 2013-14, o diya 1 de setiembre de 2013, seguindo a recomendación feita por o Chusticia d’Aragón. O portavoz Adolfo Barrena, informa de que “o Chusticia ha inviau una sucherencia t’a consellera d’Educación, Dolores Serrat, indicando-le que ha de prener as midas que pueda, en función d’as previsions presupuestarias, ta que en os venients cursos escolars, o profesorau interino se incorpore o 1 de setiembre, diya que prencipia l’actividat docent”.

Ista recomendación ye conseqüencia d’a queixa presentada por un ciudadan debant d’o Chusticia. A queixa surte d’a Orden d’Educación de achustar a lo profesorau interino en o curso 12-13 o diya 6 de setiembre ta Primaria y o 12 en Secundaria. Seguntes o Chusticia “ista mida perchudica as condicions laboral d’o profesorau y tamién a los centros y a l’alumnalla, en haber teniu menos diyas ta parar o curso”.

En iste sentiu, o Chusticia sinyala que cal que “totz os profesors y particularment os interinos, participen en todas as actividatz de prencipio de curso, ya dende o primer Claustro, pues son alazetals ta establir os criterios pedagochicos, directrices, metodolochía, actividatz, criterios y intrumentos d’evaluación, … que han de rechir a faina docent y evaluadera mientres tot o tiempo lectivo.”

O Chusticia tamién recomienda a lo Departamento que no deixe que “as midas t’a racionalización y eficiencia d’o gasto suposen una baixada d’a calidat y eficacia d’os servicios publicos“. Por ixo creye que a mida presa “tien un efecto economico en o gasto publico de camín, pero afecta de traza negativa a la eficiencia de l’actividat docent y a la calidat d’o servicio publico educativo”.

IU comparte ista recomendación y alavez ha rechistrau una Proposición no de lei ta que se debata en la Comisión d’Educación, a on que s’exiche a lo Departamento d’Educación que achuste lo personal interino t’o curso venient o diya 1 de setiembre.

D’atra man, IU presentará en a mesma comisión una iniciativa ta que o Gubierno d’Aragón s’endrece ta l’espanyol ta que prenga as midas que calgan ta guaranciar o dreito a la educación de calidat y cheneradora d’igualdat d’oportunidatz ta totz os ciudadans, sin exclusions ni discriminacions. Ista PNL surte en aprebar-se o Decreto de “midas urchents de racionalización d’o gasto publico en demba educativa” que, ta Barrena ye “a mayor enrestida contra a educación publica d’o nuestro país dende o sieglo pasau y, antimás, ye una normativa fundament racista y xenofoba que atenta contra os Dreitos Humans y a ciudadanía universal, forachitando a los estudiants no comunitarios d’as universidatz publicas”.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.