IU exiche midas contra la nueva puyada de l’ature en agosto

O partiu ye preocupau por l'emplego destruyiu y a mala calidat d'os que se creyan.

Oficina de l'INAEM (Foto: D.Ch.A.)

Oficina de l’INAEM (Foto: D.Ch.A.)

IU ha exichiu a lo Gubierno d’Aragón solucions de camín contra la “grieu destrucción de treballo que bi ha en a nuestra Comunidat”. Asinas ha lamentau o dato d’a puyada de l’ature en 231 personas en Aragón, estando l’unico territorio de l’estau espanyol que puya l’ature por segundo mes. Igual como en chuliol, en as provincias de Uesca y Teruel l’ature ha baixau en 14 y 61 personas. Manimenos os 306 nuevos aturaus d’a provincia de Zaragoza fan iste resultau negativo ta tot lo país.

O portavoz d’Economía y Emplego de IU en as Cortz, Luis Ángel Romero s’ha amostrau preocupau por istos datos y creye que os treballadors aturaus son “pagando los efectos de una crisi que ells no han chenerau”. “L’obchectivo primer d’o Gubierno habría d’estar a creyación de treballo. Manimenos lo unico que ha feito dica agora l’executivo PP-PAR ye ‘vender fumo’ con o Plan Impulso que, por agora, no ye que un papel que no apanya o fracaso d’as politicas de Rudi y Bono en l’aria de l’emplego y d’a reactivación economica”. Romero ha remerau que o Plan estió anunciau en mayo, aprebau en pleno o pasau 12 d’agosto y que se suposa que se desembolicará dende iste chueves quan o Consello de Gubierno extraordinario aprebe o Decreto que lo meterá a funcionar. “Iste Plan no ye que un conchunto de titulars de prensa, pero no bi ha prebas evidents d’a efectividat suya y no deixa d’estar un apanyet a los Presupuestos de  2013” – ha declarau.

“As cifras de l’ature rechistrau en as oficinas d’emplego en chuliol y agosto contradicen l’optimismo que terne que terne en fa bamba o Gubierno d’ARagón, sinyala o portavoz de IU, qui adhibe que “no nomás somos preocupaus por que se destruigan os puestos de treballo, sino que tamién por que l’emplego que se creya ye de mala calidat, precario, y con piors condicions laborals y de chornals.”

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.