IU exiche solucions t’a falta de leitos psiquiatricos en os hespitals de Zaragoza

A Sociedat Aragonesa y riochana de Psiquiatría denuncia a falta de plazas ta ista mena de pacients

Patricia Luquin (Foto: IU)

Patricia Luquin, portavoz de Sanidat de IU (Foto: IU)

IU ha exichiu a la D.Ch.A. que solucione de traza urchent o traslau forzoso de pacients debant d’a manca de leitos psiquiatricos en os hespitals de Zararagoza. Ta ixo, a colla parlamentaria en as Cortes presentará una Proposición no de Lei en a Comisión de Sanidat a on que demanda a lo Gubierno que prenga de traza finitiva todas las midas, incluyindo-ie meter más leitos d’hespitalización psiquiatrica, a lo menos, dica la ratio recomendada de 12-15 leitos por cada 100.000 habitadors. “L’obchectivo d’a nuestra propuesta ye de privar os traslaus forzosos de pacients debant d’a esclatera manca de recursos y de que no bi haiga prous leitos t’atender a presión asistencial existents de pacients con malotías psiquiatricas en os hespitals aragoneses”, explica la portavoz de Sanidat de IU, Patricia Luquin.

IU ha rechistrau a iniciativa dimpués d’a critica que a Sociedat Aragonesa y d’A Riocha de Psiquiatría ha feito dimpués d’una anyada sin fer-se efectivo a puyada de 19 a 30 leitos psiquiatricos que anunció o conseller de Sanidat, Ricardo Oliván, t’o sector sanitario II (Hespital Universitario Miguel Servet) y ha tornau a denunciar os problemas que ye creyando que no bi haiga prous leitos publicos. Aragón tien un deficit d’o 39% cuanto a la debantdita ratio recomendada.

D’a mesma traza, ista asociación ha denunciau a situación a on que se troban pacients con malotías psiquiatricas agudas y o criterio d’hespitalización emplegau que rezaga o suyo ingreso por plena ocupación y mesmo ha provocau que se levasen pacients dende Zaragoza dica la unidat de l’Hespital Bispe Polanco de Teruel y siet pacients ta l’Hespital Sant Chorche de Uesca, qualcosa que dende a Sociedat dicen que ye “un feito que nomás pasa en psiquiatría y no en garra atra especialidat medica”.

A diputada de IU diz que “gracias a los repagos”, a las retalladas y a las privatizacions d’a Sanidat Publica, que antis yera universal, agora ha perdiu calidat, eficacia y eficiencia, puyan as listas d’aspera, deixa excluyius a bells colectivos como inmigrants en situación irregular, y muitos pensionistas que deixan de consumir medicamentos en no poder pagar-los debant d’a grieu situación economica y social”. En iste sentiu, Luquin denuncia que a politica sanitaria d’o Gubierno trai conseqüencias muito negativas t’o sistema publico de salut, grieument perchudicau Aragón por a mala chestión desembolicada por o conseller Oliván”.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.