IU exiche transparencia en as subvencions d’a DPZ

Demandan que se modifiquen as bases t'a conseguir istas aduyas

Pleno d'a DPZ (Foto: IU)

Pleno d’a DPZ (Foto: IU)

A colla provincial de Izquierda Unida en a Diputación Provincial de Zaragoza (DPZ) vien denunciando dende fa dos anyadas la formula de reparto d’os fundos d’a institución entre os Concellos y as entidatz sin animo de lucro, ya que considera que iste se fa «con un sistema de cupos de reparto entre partius que no tien nian unos minimos de transparencia y equidat y que afunda en o clientelismo».

En iste sentiu, o diputau de IU, Jose Ángel Miramón, consideró que «a DPZ ha d’aduyar y refirmar a los municipios, pero istas aduyas han de plegar con independencia d’o peso de l’alcalde suyo en o partiu u d’a color politica d’o mesmo«. «En istos intes – contina Miramón – os ciudadans demandan mayor transparencia y a DPZ camina en a endrecera contraria perpetuando istas practicas».

A concesión d’as aduyas de presidencia, explicó lo diputau de IU «no tien garra criterio obchectivo y a suya comisión valoradera ye un teatret, nomás ha de marcar-la o dido d’una colla institucional y adintro d’o presupuesto que a iste le’n han dau ta otorgar-ne; y no hemos d’ixublidar que ista anyadas podrían representar más d’o 10% d’o gasto provincial».

A opacidat en a chestión d’as subvencions ye una d’as cualidatz que se ha veniu denunciando quan IU yera difuera d’ista institución y tamién en istas dos anyadas dende adintro d’a mesma. Asinas lo indicó Miramón en decir que «levamos meses prebando d’acceder t’os expedients de chustificación d’ista mena d’aduyas, demandando conforme a la lei y a lo propio reglamento organico d’a Diputación, pero lo Gubierno provincial empacha a fiscalización a la que ye obligau y tien dreito una colla d’a oposición».

Antimás, a organización de cuchas considera que «luen de alufrar un minimo proposito de cambiar a lo que veniba fendo Lambán, o president Beamonte ha afundau en istas practicas, mesmo modificando a ordenanza de subvencions ta facilitar o mecanismo d’aduyas dreitas».

Por tot ello, o portavoz de IU en a DPZ aboga por una funda modificación d’as bases d’ista convocatoria, que guarencien obchetividat, basaus en criterios de equidat, necesidat y mica dependencia d’o criterio partidista, tanto en as endrezadas t’os concellos como aquellas que reciben as asociacions; y tal y como proposó en o debat de presupuestos, ista linia d’aduyas tienga la mesma fiscalización con que contan a resta de plans provincials. «Nomás asinas enantaremos en transparencia», afirmó Miramón.

D’atra man, dende IU s’entiende que istas noticias «son un contrasentiu a la Lei de Anti- Concellos que tramite o Gubierno de Rajoy», por lo que remata decindo que «o PP quier esfer Concellos por ineficaces y deixar-los en institucions como a DPZ». Dende l’anvista de Miramón, isto ye «una error graniza», ya que en a suya opinión, «ni as diputacions son pensadas ta chestionar servicios dreitos a los ciudadans, ni son capables, ni han contrimostrau chestionar millor y con más transparencia os fundos publicos como podemos comprebar. Antimás no se cabidará, tot lo contrario».

 

Fuent: http://www.cronicadearagon.es/wordpress/?p=41524&utm_source=feedly

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.