IU leva t’o Congreso a Especialidat d’Asturiano

Gaspar Llamazares, presentó ahiere quatro preguntas sobre a promoción de l'emplego d'a luenga asturiana y a reconoixedura d'a Especialidat docent d'os mayestros que imparten a materia.

Gaspar Llamazares, diputau d'IU en o Congreso por Asturias. (Foto: Wikipedia)

Seguntes publicó ahiere lo diario asturiano Les Noticies, o Grupo d’IU en o Congreso, a traviés d’o diputau Gaspar Llamazares, presentó ahiere quatro preguntas sobre a promoción de l’emplego d’a luenga asturiana y a reconoixedura d’a Especialidat docent d’os mayestros que imparten a materia. A tramitación se fació de traza bilingüe, en asturiano y castellán. Seguntes anunción dende IU, iste va a estar o primer trango ta presentar una proposa en a Camara baixa.

As preguntas tractan sobre o nivel de conoiximiento d’o Ministerio d’Educación sobre a reyalidat educativa de l’idioma, os suyos resultaus pedagochicos y a suya contribución a l’adquisición d’as competencias basicas. A segunda d’as qüestións se refiere a la valuración que fan dende o Ministerio sobre a demanda d’a Especialidat “de practicament toda la comunidat educativa asturiana, a Chunta Cheneral, a Chunta de Personal Docent y o mesmo Consello Escolar de l’Estau”. D’atra man, preguntan qué tien pensau fer l’Estau ta fer efectiva la demanda y si dende o Ministerio considerón as aventallas educativas, curriculars y de planificación que representa a reconoixedura d’a Especialidat.

O documento, que plega de dentrar en proceso de tramitación, fa servir o castellán y l’asturiano y prencipia fablando d’a regulación legal de l’amostranza de l’idioma propio y d’a formación d’o profesorau, “que tien un caracter de raso reglau en os estudeos que ufierta la Universidat d’Ovieu”. Man y menos, remeran que, con tot y con ixo, “l’amostranza recaye en mans de profesors interinos u en expectativa de destín, o que acarreya problemas ta l’asignatura y una desigualdat de tracto t’o profesorau”.

Dende IU remeran que por istos argumentos, en chunio d’o 2008, o Consello Escolar de l’Estau dio por trancada la reconoixedura d’a Especialidat, “l’unico elemento que da seguridat d’a estabilidat d’o profesorau, en permitir a convocatoria d’oposicións, a insertación en a plantiella d’o centro u acceder a concursos de treslaus, a más de que ye un elemento de racionalización administrativa, pedagochica y economica”. Por tot ixo, solicitan a o Ministerio, l’unico organo con capacidat administrativa en iste ambito, “una aición decidida dende l’anviesta d’a regulación d’as especialidatz docents”.

Fuent: http://www.lesnoticies.com/lesnoticies/noticies/lleva-congresu-especialida-d%27asturianu/9070

Una rispuesta a IU leva t’o Congreso a Especialidat d’Asturiano

  1. Prou que si CHA no fa lo mesmo en o tocant a l’aragonés, será condición prou como pa exichir a dimisión d’o suyo puesto en o Congreso d’os Diputaus.
    O simple feito de que IU l’haiga feito antis, ya me pareix prou grave.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.