IU pregunta en Europa por a deslocalización de HP

Willy Meyer se pregunta a on ye a responsabilidat social corporativa d'a interpresa d'o sector d'a informatica

Willy Meyer (Foto: IU)

Willy Meyer (Foto: IU)

L’eurodiputau de Izquierda Unida Willy Meyer ha presentau una pregunta parlamentaria t’a Comisión Europea tocant a los plans de Hewlett Packard ta forachitar treballadors en o suyo centro de treballo d’o Poligono Industrial d’o Pilar, en Zaragoza. “Un estau no puede permitir iste saqueyo y ha de fer pagar a las multinacionals por a suya estratechia vampirica”, ha aformau o diputau.

“Nos trobamos debant d’atro caso de multinacionals que deslocalizan a suya producción con a enchaquia de retallar costes laborals. ¿A on ye ixa suposada responsabilidat social corporativa?”, pregunta Meyer, qui sinyala a las politicas d’o PP: “Istas multinacionals aprofeitan as sobrebuenas condicions que les brinda a zaguer reforma laboral d’o PP ta esfer-se d’os treballadors suyos sin mirar-se enta zaga”.

“HP ye una d’as principals multinacionals d’un sector que no deixa de creixer, manimenos en 2012 anunció una reestructuración internacional d’a interpresa que afectará en Europa a 8.200 treballadors. En o centro de Zaragoza treballan 1.100 treballadors que podrían viyer-se afectaus por ista mida y a interpresa se niega a dar información sobre os plans suyos t’o comité d’interpresa”, informa IU.

“Somos fartos de viyer como as multinacionals vienen ta Espanya atrayidas por arrienda incentivos por l’administración publica y dimpués de bellas anyadas as companyías marchan t’atro país a on que les ye más barato producir”, denuncia Meyer, qui adhibe que “a desindustrialización d’o país y o suyo gran desemplego se debe a ista confitanza depositada en multinacionals que han estricallau o sistema industrial”.

En o caso d’o centro de Zaragoza, IU ha remerau que a multinacional ye estada beneficiada por l’administración publica de diferents trazas. A traviés d’un rechimen fiscal prou aventalloso con o programa “Invest in Spain” asinas como a traviés d’a compra en 2008 d’a interpresa Iberalbión, propiedat de Barclays, a qui le pilló os terrenos publicos a on que agora ye a companyía a pres muito por debaixo d’os d’o mercau.

O Pleno d’as Cortes ya aprebó o pasau 6 de chunio una Proposición no de Lei presentada por IU de refirme a las treballaderas y treballadors d’o grupo HP en Aragón y a on que s’instaba a lo gubierno d’Aragón a fer todas as accions y midas que calesen ta esfender y guarenciar o mantenimiento d’a totalidat de l’¡emplego y l’actividat d’o grupo en Aragón y a ubrir un proceso de dialogo y cooperación con a dirección de HP y os representants d’os treballadors que permita amillorar os cauces de negociación y contribuiga a plegar en un alcuerdo colectivo.

 

Una rispuesta a IU pregunta en Europa por a deslocalización de HP

  1. Pingback: IU pregunta en Europa por a deslocalización de HP | AraInfo | Achencia de Noticias d´Aragón

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.