IU presenta hué una moción sobre l’agroganadería ecolochica

O deputau d'IU por l'Alto Aragón, Miguel Aso, presienta hue una moción con siet propuestas ta empentar l'agricultura y ganadería ecolochicas como sector puntero t'o desembolique economico de Aragón.

Vacas pastando en a Ribagorza (Foto: Lucía López Marco)

O deputau d’IU por l’Alto Aragón Miguel Aso, presentará hué en a Comisión d’Agricultura, Ganadería y Meyo Ambient una moción sobre l’agricultura y ganadería ecolochicas. “Ta Izquierda Unida –sinyala Aso- l’agricultura y ganadería ecolochicas son dos sectors que hemos de promocionar ta fer d’Aragón a Comunidat Autonoma puntera en ista materia, pues ista mena d’agricultura y ganadería, amás d’os indubdables beneficios t’o meyo natural y t’a salut, tien grans posibilidatz de desembolique como actividat economica sostenible”.

Ta que l’agricultura y ganadería ecolochicas sían un sector estratechico, a iniciativa de IU replega siet midas. Entre ellas, insta a o Gubierno d’Aragón a enchegar a lo largo d’o 2012 un programa contino de formación y innovación en materia d’agricultura y ganadería ecolochica que, en colaboración con a Universidat de Zaragoza y con os diferents sectors implicaus, abarque a formación d’agricultors y ganaders a tecnicos, pasando por a enchegada de prochectos d’Investigación y Innovación sobre agroecolochía y control biolochics de plagas.

Amás, a moción incluye l’empentón, en coordinación con os Concellos, Comarcas y sectors implicaus, de midas que favoreixcan os circuitos curtos de transformación, consumo y comercialización de productos agroecolochicos aragoneses (mercaus, asociacións de consumidors, y asinas asinas); y a promoción de campanyas d’información, promoción y sensibilización dirichidas a os consumidors, incluindo a profesionals d’a hostelería y restauración, ta dar a conoixer os beneficios d’os productos ecolochicos.

Aso proposará tamién a l’Executivo PP-PAR establir linias d’aduya y incentivos fiscals, que permitan remanir y fer creixer os productors y as explotacións agroganaderas en Aragón, asinas como empentar as Midas Agroambientals d’a PAC a l’agricultura y ganadería ecolochicas, especialment entre os anyos 2012 y 2013, dica a dentrada en vigor en 2014 d’o nuevo Plan de Desembolique Rural, ta privar l’actual perda de competitividat d’o sector aragonés en relación a atras comunidatz autonomas.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.