IU presenta queixas por os entrenamientos militars en l’aeropuerto de Zaragoza

IU leva t'a Comisión Europea, t'o Congreso y t'as Cortes a suya denuncia y queixa por l'emplego de l'aeropuerto de Zaragoza ta entrenamientos militars d'a EDA y d'a OTAN

F-18 de l'exercito espanyol (Foto: Contando estrelas)

F-18 de l’exercito espanyol (Foto: Elentir)

Izquierda Unida amostró iste lunes o suyo refús de tot a l’emplego de l’aeropuerto de Zaragoza como base militar. Lo fa dimpués de conoixer que mientres dos semanas se i desembolicará o Programa Europeu d’Entrenamiento de Transporte Aereo Tactico en Zaragoza y que l’Achencia Europea d’Esfensa planeya convertir istas instalacions en una base d’entrenamiento ta grans aeronaus militars “ta cabidar costes a Estaus Unius”, seguntes a formación.

IU ha demandau información de camín t’o Parlamento Europeu, a traviés d’o suyo eurodiputau Willy Meter y en o Congreso Espanyol,  y en as Cortes d’Aragón. Ha exichiu que espacios publicos como l’aeropuerto se desmilitaricen y o diputau Miguel Aso, ha demandau a lo conseller d’Obras Publicas y Transportes que explique “quan anunciarán a declaración de l’aeropuerto de Zaragoza como d’emplego nomás civil, ta empachar as servidumbres que suposan os suyos emplegos militars”.

Adolfo Barrena, portavoz de IU en o parlamento, denunción que “ista servidumbre hipoteca o futuro y l’actividat de l’aeropuerto de Zaragoza. Antimás, dende a colla parlamentaria, denuncian o periglo d’as practicas que se ferán mientre dos semanas 350 militars, con dotze grans aeronaus, antimás de F-18 y Eurofighters en os campos de maniobras de Sant Gregorio y Ablitas.

“Tanto a OTAN como a EDA fan servir l’espacio aereo peninsular como si estase un tabler de Risk a on que ensayar a guerra, pero con a guerra no se chuga”, ha dito Barrena, qui adhibe que “istos entrenamientos son ensayos chenerals d‘operacions militars que acotolan milenta vidas totz os diyas”.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.