IU proposa 10 midas ta solucionar a grieu situación economica d’o Concello de Monzón

Miguel Aso: “D'o PP-PAR depende que i viengan diners, pues a la ciudat no le dan un euro”

Miguel Aso, concellal de Monzón. (Foto: IU Aragón)

O grupo municipal d’IU en o Concello de Monzón proposa diez midas ta solucionar a “grieu” situación economica en a qual se troba o Consistorio “como conseqüencia d’a caita d’ingresos ordinarios y, más que más, d’a reducción d’as aportacións y a capacidat de financiación a las Entidatz Locals aplicada por os Gubiernos central y autonomico (hue PP y antes PSOE)”, sinyala Miguel Aso, o vocero d’IU en Monzón.

Amás, Aso muestra a suya disconformidat con a “publicidat de l’equipo de Gubierno municipal PP-PAR y as suyas meyas verdatz”, critica que “s’adedican a fer oposición a la oposición, en cuentas de gubernar” y les remera que “antes d’acceder a o gubierno d’a ciudat teneban como grupo d’a oposición, a obligación de conoixer a situación municipal y fer un programa sobre a base d’ixo”.

Entre as 10 midas proposadas por IU, destaca a presentada a traviés d’as esmiendas d’o suyo grupo parlamentario a o Prochecto de Lei de Presupuestos d’Aragón ta 2012 con l’obchectivo que a DChA aporte 1.100.000 euros a Monzón t’a urbanización d’o nuevo colechio y t’o poligono d’a Armentera. “D’o PP-PAR depende que i viengan diners, pues a la ciudat no le dan un euro”, denuncia Aso.

En relación con l’Armentera, “o Concello fació un esfuerzo economico muit important totz dos zaguers anyos abanzando diners ta executar as obras en iste poligono como as de depuración”, diz o concellal y reclama “cobrar ya as taxas de depuración y urbanización a las interpresas afectadas, o que nos ha de permitir ingresar uns 200.000 euros iste anyo”.

Y por lo que fa a o nuevo colechio, “o suyo prochecto d’urbanización –contina Aso- prencipió a fer-se por un arquitecto municipal y o PP remató encargando-lo difuera”. Por iste motivo, IU demanda que os tecnicos municipals se faigan cargo d’istes prochectos ya que orichinará un estalbio d’uns 70.000 euros anyo. Amás, Aso proposa que o Concello negocie con Rudi ta que os 500.000 euros d’a urbanización d’o nuevo colechio sían t’a suya execución por a interpresa publica Sulero y Vivienda d’Aragón.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.