IU refusa a politica ferroviaria d’o PP y no asiste t’a venta d’a gara de Canfranc

Creyen que a gara habría d'estar una estación internacional en funcionamiento.

A gara mientres a sinya d'a venta (Foto: D.Ch.A.)

A gara mientres a sinya d’a venta (Foto: D.Ch.A.)

IU Aragón no asistió ahiere a l’acto a on que a ministra de Fomento, Ana Pastor, y a presidenta, Luisa Fernanda Rudi, sinyoron o convenio ta que a gara internacional de Canfranc se transmitise a Aragón.  Lo facioron t’amostrar asinas o suyo refús t’a politica ferroviaria d’o Gubierno espanyol.

IU Aragón creye que l’acto “ye hipocrita, porque a ministra vien t’Aragón ta fer-se una foto entre que o gubierno suyo ye protagonizando a más gran enrestida t’o sistema ferroviario internacional en l’Estau y más que más en o nuestro territorio”, critica o diputau de IU por l’Alto Aragón, Miguel Aso.

O partiu ha manifestau estar preocupau por o feito de que “Fomento, a traviés d’AFER, haiga decidiu de vender a l’Executivo PP-PAR a gara de Canfranc, quan o ministerio ye propietario d’as garas de tren de l’Estau“. Seguntes Aso, “Canfranc ha d’estar y ha de tener como emplego fundamental o d’una gara internacional y, si l’Adif s’esfa d’ella, nos fa pensar que no tien gran intrés en reubrir-la, a lo menos en o curto plazo”.

“A partir d’ixo – diz Aso – nos perocupan dos qüestions alazetals: d’una man, que o gubierno d’Aragón gaste más de 300.000 euros en mercar iste bien que ya yera publico, por lo que l’Estau ya ha feito caixa con ell, quan ye retallando en servicios alazetals. D’atra man, o Gubieno piensa en o suyo emplego t’a hostelería quan se ye zarrando Paradors, lo que, en o nuestro chuicio ye una muestra de que a gara podría continar de tot igual mientres muitas anyadas, bella cosa que no podemos permitir-nos.”

En l’acto a minsitra espanyola, Ana Pastor, protagonizó a esbarizada d’o diya, quan dició que una d’as cosas que caleba amillorar yera a catenaria quan, como declaró dimpués Luis Granell, representant de CREFCO (Coordinadera t’a reubridura d’o Ferrocarril Canfranc  – Oloron), “a linia nunca no heba estau electrificada” y, alavez no heba teniu catenaria.

 

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.