IU refusa que se den 5,5 millons en subvencions “a dido” en a DPZ

IU denuncia a puyada d'as partidas presupuestarias d'aduyas de presidencia ta dar-las "de traza clientelar"

DPZ (Foto: Arainfo)

DPZ (Foto: Arainfo)

A colla provincial de Izquierda Unida en a DPZ ha sinyalau que ista anyada se crebará o record en as aduyas dreitas como formula de reparto de fundos entre concellos y asociacions, con un sistema de “cupos entre partius sin que se respeten os criterios de transparencia y equidat, y en bells casos que trucan muito lo ficacio, ta fins muito discutibles en istos tiempos”.

Jose Angel Miramón, de IU, ha indicau que as aduyas de presidencia, que plegan en os 17,6 millons d’euros, no tienen “garra criterio obchectivo y a comisión que valura as solicitutz ye formada nomás por diputaus d’o PP.”  Antimás, o portavoz d’a formación, ha tornau a demandar os informes d’a Intervención de fiscalización d’as aduyas de presidencia de 2010 y 2011, ya que encara no se’n ha informau a lo Pleno. Tamién ha demandau a información sobre o reparto de fundos provincials por l’atro mecanismo d’aduyas dreitas que prencipió dimpués de modificar-se a ordenanza de subvencions, que se traduz en a celebración de convenios de colaboración con entidatz y concellos y que ferá que a cifra anyal de “aduyas clientelars” puyen a-saber-lo en iste exercicio. Miramín ha demandau a lo president que “cumpla las exichencias legals de publicidat de beneficiarios, importes y actividatz u prochectos a subvencionar, lo que terne que terne incumple a Diputación Provincial.”

D’atra man, una moción de IU que demandaba adhibir clausulas socials, laborals y meyoambientals en os achustes de obras y servicios d’a institución provincials, sí que se ha aprebau. A intención d’ista moción yera que, en os pliegos de condicions de contratación d’a DPZ, bi hese “unas condicions laborals dignas y unas condicions meyoambientals adequadas, de vez que se favoreixese a inseción laboral de colectivos desfavoreixius.”

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.