IU solicita a la Cinca Baixa que esvielle os contenedors deterioraus

Izquierda Unida demanda a la Comarca información sobre o estau d'a petición que realizó ta que s'instalen contenedors de reciclache de papel/cartón en o vico de Litera de Fraga.

Contenedor deteriorau en Fraga. (Foto: IU)

IU ha solicitau a la Comarca d’a Cinca Baixa que proceda a esviellar os contenedors de reciclaxe (papel/cartón, veire y plasticos) deterioraus que se troban situaus en quantas zonas de Fraga, concretament en l’avenida d’Aragón, paseu Constitución, avenida Reis Catolicos, explanada d’o Sotet, carrera Alifonso I, paseu Barrón, Chirmana Andresa y carrera Chaime I.

D’atra man, IU Fraga solicitó información a la entidat comarcal sobre o estau d’a petición que a formación politica cursó o pasau mes d’aviento, “solicitando a instalación de contenedors de reciclaxe de papel/cartón t’o Vico de Litera debant d’as queixas d’os vecins, que a día de hue, han de desplazar-se en os suyos propios vehíclos a Fraga ciudat ta depositar o cartón en os contenedors destinaus a l’efecto”, explica o Coordinador de IU Fraga, Xandru Sánchez.

Sánchez amuestra publicament “a suya preocupación por as constants queixas debidas a l’acumulación de bardoma en as carreras de Fraga que, en un contexto cheneralizau d’achustes presupuestarios en as Administracions Publicas, podese derivar en un proceso d’externalización d’o Servicio Municipal de Limpieza”. “Entendemos que si s’acumula vasuera y bardoma en as carreras de Fraga, -contina- ye por a falta de meyos que disposan os treballadors d’o servicio de limpieza”. En iste sentiu, IU s’oposará rotundament a qualsiquier proceso de privatización d’o servicio municipal de limpieza de Fraga, entendendo que a mesma empioraría o servicio y conlevaría una precarización d’as condicións laborals d’os treballadors. De vez, reclama un aumento d’os meyos materials que disposan os treballadors.

Por iste motivo, IU ha ninviau un escrito a la Comarca chunto con documentación fotografica.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.