IU s’oposa a la unión d’as estacions d’esqui

Refusan os prochectos por os costes economicos y meyoambientals y o sobredimensionamiento d'a ufierta

Miguel Aso, diputau de IU (Foto: Blog de Miguel Aso)

Miguel Aso, diputau de IU (Foto: Blog de Miguel Aso)

IU ha refusau l’apuesta d’o gubierno PP-PAR por o prochecto d’unión d’as estacions d’esquí d’as Vals de l’Aragón y d’o Galligo, a traviés d’Astún y Formigal. O suyo portavoz de Meyo Ambient en as Cortes, Miguel Aso, considera que “a unión suposa una decisión erronia que contrimuestra l’ausencia d’un prochecto de desembolique sostenible y de futuro ta l’Alto Aragón”. “A falta de ideyas – diz – continamos con o mesmo modelo basau en destinar totz os nuestros recursos ta una actividatz, ya de por sí sobredimensionada.”

Cuanto a lo modelo de desembolique socio-economico, Aso asegura que, “ye contrimostrau que iste modelo, fueras de bella excepción, no ye rendible economicament.” A preba d’isto, seguntes o diputau ye que “a la fin, L’Administración publica s’ha feito cargo de estacions dica agora chestionadas de traza privada” en referencia a Candanchú en Aragón y a quatre estacions catalanas. “No cal ixublidar que contruyir istas infraestructuras ha iu siempre d’a man d’un desembolique urbanistico incrontrolau que ye estau lo que ha feito esclatar l’actual crisi economica y financiera”, adhibe.

Cuanto a l’impacto ambiental d’a unión d’as estacions, Aso manifiesta que ye “muito negativo y no se puet negar y esdevien en  un entrepuz t’o desembolique d’atra mena d’actividatz economicas vincladas a lo meyo natural, menos desarrollistras, pero más estables y con mayor esdevenider”. Antimás, o diputau dubda de que a unión d’estacions suposa a largo plazo una puyada d’o numer d’esquiadors. “Ye facil d’esmaixinar que, con l’ampla ufierta que agora bi ha, lo unico que conseguiremos ye que se distribuigan entre as dos vals, pero a un coste economico y meyoambiental inchustificau”, apunta. Ta IU, existen atras dembas que satisfacen necesidatz basicas u que con o tiempo pueden resultar estratechicos y que les cal más ficacio (sanidat, educación, asistencia social, agricultura y ganadería, etc).

Aso remata decindo que IU “no ye en contra d’as estacions d’esquí” y reconoix “a dinamización socioeconomica que ha suposau ta belunas d’as nuestras vals”, pero crei que istas infraestructuras prencipian a estar sobredimensionadas y cal mirar atras alternativas economicas”. “Tamién ye l’inte d’exichir una mayor transparencia y participación en as interpresas publicas que las chestionan”.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.