IU Uesca demanda obras urchents t’apanuar o centro civico Santiago Escartín

O centro tien gotilleras, filtracions u espiellos crebaus, entre atros problemas

Imachen d'un d'os desperfectos (Foto: IU)

Imachen d’un d’os desperfectos (Foto: IU)

A colla municipal en o Concello de Uesca ha demandau en a Comisión de Cultura, a on se chestiona o Centro Civico Santiago Escartín, que se faigan de traza urchent as obras de acondicionamiento d’iste edificio, que ye en un estau penible en bellas partis y que podría rematar fendo-lo inservible, ya que bellas actividatz ya funcionan de malas trazas por as condicions d’o centro.

“Consideramos que en iste penible estau l’edificio no cumple as condicions minimas propias d’una instalación municipal, a la que lo minimo que cal exichir-le son unas condicions dignas ta que lo faigan servir os ciudadans y ciudadanas y a on que se desembolican arrienda programas municipals  y actividatz de diferents asociacions”, explica la portavoz de IU en o Concello de Uesca, Pilar Nonales.

“A la finitiva, – contina- hemos levau t’a Comisión que cal encetar as obras de camín, y fer-ie un mantenimiento adequau ta privar que empiore a suya situación y puedan fer-se as actividatz d’o centro con normalidat”.

“Encara que ye cierto, como diz l’equipo de gubierno, que se fan politicas positivas en o Vico d’o Perpetuo Socorro, ha de contrimostrar-lo con feitos tanchibles, y en iste caso, no ha de deixar por más tiempo o Centro Civico en ixas condicions, actuando-ie de camín, en cuenta de deixar-lo albandonau”, avisa Novales.

Entre os problemas d’infraestrucura que ha denunciau IU, bi ha a-saber-las gotilleras, que fan que se devante o parquet y que fa imposible fer bellas actividatz en que pleve. As gotilleras, antimás, son creyando situacions periglosas en cayer belunas amán d’instalacions electricas. Filtracions d’augua que estricallan a estructura, espiellos crebaus en os escusaus u un sistema de calefacción no adequau en o salón d’actos, son bells atros problemas denunciaus.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.