IU y CHA demandan más compromís d’o concello de Uesca con l’alimentación basica d’as familias

As dos formacions creyen que o Concello de Uesca ha d'asumir a responsabilidat en espardir os alimentos basicos t'as familias, más que más en tiempos d'emerchencia social

Luis Gallego, conceller de CHA (Foto: CHA)As collas municipals de Uesca de IU y CHA, con una petición formal t’a concellera d’Afers Socials, han traladau a l’Equipo de Gubierno que cal incluyir en os Servicios Socials d’o Concello l’alimentación basica d’as familias en risque d’exclusión social, como aduya estructural mientres toda l’anyada.

Encara que no ye ista una competencia d’o Concello, fueras d’os casos puntuals d’aduyas d’emerchencia, dende as dos collas entienden que cal embrecar-se en a demba más basica t’a vida digna d’as personas, como ye que a población tienga a virolla alazetal.

Demandan a la concellera Marta Escartín que en a venient Comisión de Bienestar Social siga incluyiu iste afer en l’Orden d’o Diya ta implantar un servicio de alimentación basica.

Ta Pilar Novales, “a grau situación economica fa que calga que s’embrequen más os nuestros Servicios Socials, qui conoixen a realidat d’as familias uescanas. Y ta embrecar-se cal asegurar mientres toda l’anyada prou cantidat de productos d’alimentación basica por persona, bien con recursos propios, vien convenindo con atras institucions y entidatz”.

“Quan charramos de necesidatz basicas, dende IU y CHA charramos de dreitos, no pas de caridat. Ta nusatras ye una obligación dotar de prou virolla a todas as personas que viven en a Ciudat que a suya situación economica no les permite mercar-los con os suyo propios meyos”, remata Luis Gallego.
 

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.