Jorge Cardona, bronze en o Mundial de Tenis de Mesa pa Personas con Discapacidat

Fuoron redotaus en a semifinal por a selección china. Manimenos, o bronze yera asegurau. Cardona suma a seisena medalla entre europeus, mundials y paralimpicos

Jorge Cardona, Alberto Luño y Enrique Ruiz, d'o CAI Santiago (Foto: Comunicación Tenis de Mesa)

Jorge Cardona, Alberto Luño y Enrique Ruiz, d’o CAI Santiago (Foto: Comunicación Tenis de Mesa)

L’aragonés Jorge Cardona ganó ahiere en Pekín a medalla de bronze en o Campionato d’o Mundo de Tenis de Mesa pa Personas con Discapacidat en a categoría por equipos Clase 10 con a selección espanyola, chunto a l’andaluz José Manuel Ruiz y o extremenyo Juan Bautista Pérez, que no i participó. As eliminatorias se disputoron a 5 partius, dos individuals, un de dobles y atros dos individuals si calese.

O combinau espanyol venció a Echipto y Suecia en a primer fase por 3-0, encara que perdió con Indonesia 1-3. Como segundos de grupo, disputoron a venient fase, en a luita por os metals, contra a dificil Ucraína. Manimenos Cardona y Ruiz no dioron oportunidat y vencioron con un contundent 3-0.

En semifinals, ya con o bronze asegurau, luitoron contra China por un puesto en a final. Os chinos vencioron por 3-0, pese a os achustaus parcials. Finalment, Polonia venció a China en a gran final.

Cardona, d’o CAI Santiago aragonés, suma iste metal a os aconseguius en os Chuegos Paralimpicos de Pekín y Londres, dos campionatos d’Europa y una plata, y una plata y un bronze en os Campionatos d’o Mundo.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.