José Luis Soro, nuevo president de CHA en a IX Asambleya d’o partiu

Maitín se trancará l'Asambleya de CHA con a presentación d'os nuevos organos y a presencia de organizacions internacionals.

Con un 74% d’os votos José Luis Soro ha estau trigau nuevo president de Chunta Aragonesista que cilebra iste cabo semana a suya IX Asambleya nacional. Soro, diputau en as Cortz, yera l’unico candidato ta relevar a Nieves Ibeas, presidenta mientres os zaguers 4 anyos.

José Luis Soro ha dito, tras o suyo nombramiento que tien por debant un tiempo de crisis muit duro en a sociedat pero que asume o cargo con responsabilidat y alegria ta esfender os intreses d’Aragón. Amás de l’esvielle d’os cargos organicos os más de 400 asambleyarios han debatiu tamién buena ripa de mocions entre las que destaca o refús a la nueva reforma laboral d’o gubierno espanyol. O president d’a Mesa de l’Asambleya, Carmelo Asensio, ha quiesto remarcar o camín de CHA ta recuperar as esencias de l’aragonesismo de cuchas.

A presidenta salient, Nieves Ibeas, s’ha despediu remerando os que ha dito han estau os quatre anyos más intensos d’a suya vida, y ha afirmau que marcha porque yera l’inte d’una renovación. Ibeas continará como vocera en a colla parlamentaria de CHA en as Cortz d’Aragón.

José Luis Soro

Naixiu de Zaragoza en 1966, José Luis Soro ye  licenciau en Dreito por a Universidat de Zaragoza y letrau d’o Reyal y Ilustre Colechio d’Advogaus de Zaragoza dende 1993, encara que agora no exerce. Soro ye militant de CHA dende 1994 y ha estau responsable d’a Vicesecretaría Cheneral d’Acción Politica dende 2008. Estió vocal d’a Maya de Pleitos de 1995 a 1997, secretario d’a mesma de 1998 a 2000 y president de 2004 a 2007.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.