Juan Alberto Belloch no se presentará a la reelección como alcalde de Zaragoza

L'alcalde de Zaragoza deixará o suyo cargo que ha exerciu mientres 12 anyos en no presentar-se a la reelección. Manimenos, acotolará a lechislatura

Juan Alberto Belloch , en un acto electoral (FOTO: Jorge Bernal)

Juan Alberto Belloch , en un acto electoral (FOTO: Jorge Bernal)

L’alcalde de Zaragoza, Juan Alberto Belloch ha anunciau hue que renuncia a presentar-se a la reelección como alcalde de Zaragoza. D’ista traza, o PSOE tendrá un nuevo candidato a l’alcaldía d’a capital aragonesa en as eleccions municipals d’o venient mayo de 2015. L’alcalde ha compareixiu debant d’os medios de comunicación a las 11 h. con caracter d’urchencia.

Belloch ha anunciau que acotolará o suyo mandato, que leva exercendo dende chunyo de 2003. Asinas mesmo ha declarau que ista decisión la heba presa fa a-saber-lo tiempo, pero no la heba anunciada con a fin de no chenerar un tiempo d’incertidumbre en o suyo partiu y facilitar o proceso de primarias que ha de trigar a o candidato a alcalde. Istas primarias encara no tienen calendata, a qual se discutirá manyana en a Executiva rechional, con o lider estatal d’o PSOE Pedro Sánchez.

L’alcalde de Zaragoza ha denunciau o proceso de primarias que va a realizar o suyo partiu, pus en as ciudatz con alcalde d’o PSOE, os candidatos en primarias habrán de reunir un 51% d’avals d’os afiliaus y afiliadas d’o partiu en 8 días. Belloch considera que ye “practicament imposible”. Considera que “Ista ye una cantidat que ye feita pa inhibir a realización de primarias en puestos en que i haiga alcalde socialista”, pus en no consiguir os avals garra candidato u candidata, l’alcalde sería proclamau candidato de nuevas. En renunciar Belloch, os candidatos y candidatas habrán de reunir un 20% d’avals.

Belloch tamién ha indicau que a suya decisión ye chustificada por “coherencia politica” pus han de renovar-se as ideyas, y istas han de fer-lo con un “relevo cheneracional“.

Ha asegurau que en o suyo partiu “mal, no m’han tractau nunca” y declara que nomás tien “gratitut” ent’o suyo partiu. Belloch continará en o Senau tamién dica a fin d’a lechislatura y dimpués no sabe qué ocurrirá, estando o momento de planteyar-se o futuro.

Belloch cumplirá 12 anyos como alcalde de Zaragoza, chunto a 4 anyos mas como concellero. Belloch s’ha amostrau argüelloso d’a celebración d’a Expo 2008 y d’a construcción d’as linias d’o tramvía, asinas como de “no haber retallau o gasto social” y d’a incorporación d’as nuevas tecnolochías en a ciudat. Manimenos se lamenta d’a no celebración d’Expo Floralia 2014 u os Chuegos Olimpicos d’Hibierno Chaca-Zaragoza 2022, que habió d’albandonar en o suyo pacto de gubernabilidat con CHA y IU en ista lechislatura que acaba.

Una rispuesta a Juan Alberto Belloch no se presentará a la reelección como alcalde de Zaragoza

  1. Pingback: Juan Alberto Belloch no se presentará a la reelección como alcalde de Zaragoza - AraInfo

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.