Kosovo remata a suya “independencia supervisada” sin tener o control de tot lo territorio

Kosovo ha conseguiu un reconoiximiento internacional que no ye prou. As puertas d'a ONU continan trancadas

Hashim_Thaci, primer ministro de Kosovo (Foto: Wikipedia)

Hashim_Thaci, primer ministro de Kosovo (Foto: Wikipedia)

Quatre anyadas y meya dimpués de proclamar a suya sobernaía, Kosovo remató ahiere oficialment o periodo que ye estau conoixiu como a “independencia supervisada. Mientres iste tiempo a Colla Internacional de Supervisión ta Kosovo (formada por 25 países, a más gran parti miembros d’a UE) ha estau controlando as funcions lechislativas y executivas d’a choven republica. Isto remató ahiere mesmo y as institucions kosovars prenerán tot o control sobre os afers d’o país. Manimenos, ixo no significa que Kosovo consiga estar un estau independient como a resta.O primer ministro de Kosovo, Hashim Thaçi (a la imatge), se felicitaba o viernes d’a fin d’a “independencia cusirada” como “fita historica” d’o país. Seguntes Tahci, o país ye un caso de exito por haber “costruyiu un nuevo Kosovo, europeu y multietnico, con reformas democraticas. A tamás de reconoixer que encara manca faina de fer ta “consolidar y enfortir” l’estau, Tahçi asegura que a fin d’a supervisión internacional es “a millor valoración” que podeban recibir as institucions kosovars.

Entrepuces: o reconoiximiento internacional y a situación en o norte.

Dezada d’a retorica trunfalista de Thaçi, manimenos, s’amagan toda mena de qüestions no resueltas, tanto d’orden interno como externo. Internament, un d’os afers más dificil ye a situación en o norte d’o país que, quatre anyadas y meya dimpués d’a independencia, encara no ye baixo lo control de Pristina. Os quatro municipios de Kosovska Mitrovica, Zubin Potok, Leposavic i Zvecan – totz de mayoría etnica serbia – se gubiernan de traza autonoma y consideran que as autoridatz kosovars son ilechitimas. O pasau febrer, en un referendum convocau por istos municipios, a gran mayoría d’os residents i votó contra a suya integración en Kosovo. O nuevo primer ministro serbio, Ivica Dacic, dició l’anyada pasada que, por ell, o trestallamiento de Kosovo y a reintegración d’os municipios d’o norte en Servia yera a “unica solución realista a lo problema. Ýe de dar que Pristina se niega de tot a acceptar trestallar Kosovo.

L’atro gran entrepuz t’a republica kosovar ye o suyo insuficient reconoiximiento internacional. No ye nomás que Serbia se niegue a admitir a independencia de Kosovo: dica hue, poco menos d’a metat d’os estaus d’o mundo lo han feito. Entre os que no han establiu relacions diplomaticas con Pristina bi ha dos potencias clau, ya que tienen dreito de vieda en o Consello de Seguridat d’as Nacions Unidas: Rusia y China. Mientres qualsiquier d’as dos contine con o bloqueyo internacional a Kosovo, o país balcanico no podrá ingresar en as Nacions Unidas. Un atro frent ubierto ye aintro d’a mesma Unión Europea: d’os suyos 27 miembros, bi’n ha cinco (Espanya, Eslovaquia, Rumanía, Chipre y Grecia) que no reconoixen a Kosovo como estau independient.

Fuent: http://www.nationalia.cat/ca/noticies/1208

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.