La Ciclería, un nuevo local ta ciclistas en Zaragoza

O nuevo local contará con taller, lavader de bicis, parking, biblioteca, zona wifi, y arrienda servicios más.

 

Dos d'os socios de "La Ciclería"

Dos d’os socios de “La Ciclería”

Iste viernes se presentó en Zaragoza lo que será en bells pocos diyas un nuevo puesto de referencia t’os usuarios de bicicletas d’a ciudat. O suyo nombre ye La Ciclería y ubrirá a primers de chinero as suyas puertas en a carrera Palafox d’o vico d’a Madalena. L’espacio sustituye a lo que yera “La ciudad de las bicis”, en a carrera Predicadors, encara que enamplará os suyos servicios y actividatz.

 

Han decidiu de cambiar de local porque “La ciudad de las bicis se quedaba chicota“, seguntes declaracions de Arturo, un d’os socios d’a Ciclería. “As posibilidatz d’iste nuevo local son muito mayors. Antimás de tot lo que bi heba, taller d’autoreparación, biblioteca, … se ferá un parking con tarcheta accesible 24 horas ta que a chent pueda aparcar as suyas bicis, lo que en un vico como a Madalena a on que muitas casas no tienen ascensor, ye un servicio que puet fer muita honra”. O taller s’enampla en iste nuevo prochecto con una zona ta escoscar as bicis y un espacio “de fumos” con extracción “a on que se podrán fer treballos de tallar u soldar“. Tamién continarán ufrindo os suyos servicios como cursos de mecanica, venta de recambios, loguero de bicicletas, …

O local ye gran y bi ha espacios nuevos como un salón d’actos a on poder fer charradas u procheccions u bells espacios ta colectivos d’a demba d’a ecolochía. De feito, a ideya ye que “o local siga tamién un centro social ecolochista” porque, seguntes Arturo, “l’ecolochismo ye a unica traza de salir d’ista estafa que claman crisi”.

Mientres os meses que ha durau l’esvielle d’o local han iu fendo-lo conoixer china chana. En as fiestas d’o Pilar, estioron ubiertos mientres tres diyas ta que a chent podese dentrar-ie. Antimás, iste viernes, a masa critica, un acto celebrau totz os meses que reivindica l’emplego d’as bicis por a ciudat, remató en La Ciclería a on que quasi un ciento de personas compartioron una buena lifara.

Charrando sobre a convivencia entre ciclistas, peatons y conductors, Arturo lo tien esclatero: “As bicis t’a calzada y no pas t’a cera“. Creye que “a tamás d’o boom d’a bici que bi ha habiu dende 2007, s’ha perdiu una oportunidat“. “L’apuesta ye estada timida. D’o que s’habría puesto fer a lo que s’ha feito bi ha eixemplos de ixa timideza” y en mete beluns como Isabel la catolica u o Paseyo d’a Independencia. “En diez anyadas bi ha habiu dos cambios totals de Independencia y os politicos no han sabiu calar-ie o carril bici en una parti tan sinyalera d’a ciudat como en ye ixe Paseyo”, sinyala Arturo.  Manimenos ye optimista cuanto a l’emplego d’a bici: “Bi ha una tendencia a continar creixendo en todas as ciudatz. A bici ha plegau en a ciudadanalla ta quedar-se-ie. Isto [La Ciclería] ye tot un eixemplo d’ello. Si no bi hese demanda no se podría fer.”

La Ciclería será menada por a Sociedat Cooperativa “Cala y Pedal” que tien cinco socios que han capitalizau o suyo ature ta poder concarar iste nuevo prochecto. Antimás, ta fer funcionar o local antis con antis, os socios “han contau con l’aduya de muitas personas que han feito fainas en o local“, seguntes reconta Arturo.

 

O taller, dende una d'as finestras (Foto: Tamara Marzo)

O taller, dende una d’as finestras (Foto: Tamara Marzo)

 

Una rispuesta a La Ciclería, un nuevo local ta ciclistas en Zaragoza

  1. Pingback: La Ciclería, un nuevo local ta ciclistas en Zaragoza | AraInfo | Achencia de Noticias d´Aragón

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.