La Escueleta busca financiación

En nueu diyas remata a campanya de co-financiación solidaria d'o prochecto d'educación libre que se desembolicando en Uesca

La Escueleta ye un prochecto d’educación libre y activa que surtió y va creixendo dende octubre de 2011 en Uesca. Ye integrau por pais, mais, ninas, ninos y educadoras. A ideya naixió d’as inquietutz y tamién d’as necesidatz d’un grupo de mais y pais respective a la educación d’os suyos borches y prencipió con una trobada semanal ta compartir vivencias y experiencias, dubdas y aprendizaches.

A partir d’istas trobadas semanals creixe a necesidat de buscar un espacio educativo respectuoso con l’abance vital d’os chicotz, diferent a las guarderías u centros d’educación infantil reglaus. Un puesto an que tanto ninos y ninas como mais, pais y educadoras podesen sentir que os  procesos de creiximiento y desembolique yeran respectaus, y as creyaturas s’isen conformando en un espacio de libertat y limites que lo permitise. Un espacio ubierto a o contacto directo con a naturaleza. Ta dar-le forma legal a o prochecto se creyó l’asociación sin ánimo de lucro  Asociación t’a Educación Activa Bolandrina.

En o primer curso La Escueleta contaba con quatre familias y una educadora y o prochecto s’ubicó en un local cediu y se feba servir un parque amanau como espacio exterior. O curso pasau ueito familias i feban ya parti y aconseguión logar una caseta en un hortal en as afueras de Uesca ta fer astí l’actividat educativa. En iste curso (2013-2014) o prochecto conta ya con o refirme de catorce familias, con ninos y ninas que van dende os zero t’os seis anyos , y una segunda educadora. Alavez os empentadors de La Escueleta quieren agora fer casamuda t’unatro hortal, con mas espacio a l’aire libre y una casa muito más gran.

Manimenos a casa eslechida se troba muit deteriorada y han de convertir una destartalada caseta de mont en un autentico espacio de convivencia, aprendizache y creiximiento personal t’os más chicotz. Allora dende La Escueleta se busca refirme economico ta poder mercar o material que amenistan ta poder acondicionar o nuevo local (cal meter calefacción, instalar placas solars, acondicionar os escusaus, aconseguir un sistema seguro y constant d’augua potable, escoscar a zona exterior, pintar tot o conchunto, enchegar una fuesa septica, instalar una chicota cocina).

“O prochecto ye sostenible por si solament, pero ta afrontar iste reto amenestemos l’aportación de personas intresadas en empentar un modelo d’educación diferent, personas sensibles en temas educativos y personas que compartan con nusatros y nusatras a ideya de que si unatro mundo ye posible, unatra educación ye imprescindible” dicen a chent de La Escueleta en a pachina de crowdfunding creyada ta refirmar iste prochecto. As familias tamien advierten de que o funcionamiento d’a campanya ye que si en nueu diyas no aconsiguen os diners que amenistan, se quedan sin cosa.
escueleta
Fuent: http://www.lanzanos.com/proyectos/la-escueleta-educacion-libre-y-activa-en-huesca/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.