L’Aínsa reclama a o Gubierno d’Aragón a obridura d’a parte zarrada d’a quartena planta d’o hespital de Balbastro

Por unanimidat, a proposa d'IU, L'Aínsa reclama a o Gubierno aragonés ubrir a planta quartena d'o hespital de Balbastro ta l'uso asistencial asinas como aumentar o numero de camas

Hespital de Balbastro

Hespital de Balbastro

O Concello de L’Aínsa (Sobrarbe) aprebó por unanimidat en o pasau pleno una moción presentada por Izquierda Unida ta paliar a “deficiencia de camas que existe en l’ala cucha d’a planta quartena d’o hespital de Balbastro“.

A portavoz d’IU en L’Aínsa, Marisa Ventero, presentó ista moción debant d’a saturación que sufre o hespital de Balbastro, un hespital de referencia d’a zona que ha d’atender a una gran cantidat de lugars repartius en quantas comarcas, una d’ellas a de Sobrarbe, a la quala perteneixe L’Aínsa. A saturación en o centro hespitalario ha aumentau a causa d’a reducción de 13 camas d’a quartena planta, s’ha pasau de 165 a 152 camas, por a remodelación realizada por l’anterior Gubierno. Isto ha provocau que se produzcan situacions de colapso en urchencias con pacients que, en no poder estar ingresaus en plantas u servicios correspondients, “han de remanir en os corredors, deseparaus por biombos y en condicions inadequadas tanto t’os propios pacients, como t’os familiars y o propio personal sanitario”, explica a concellera d’IU, ta recordar que, en primeras, se dició que o espacio iba a acondicionar-se ta acullir a pacients de media estancia pero, a día de hue, “a citada planta remaneixe zarrada ta servicios asistencials, emplegando parte d’o suyo espacio ta ubicar en ella qualques despachos“.

En a suya opinión, “o reprochable no ye solament que istas situacions se produzcan en momentos puntuals, sino que se ye establindo como habitual”. Cal recordar que mientres que o hespital de Uesca cuenta con 200 camas, o hespital de Balbastro atiende a la mesma población con 152 camas.

Por tot ixo, y seguntes ha quedau refleixau en l’alcuerdo plenario, “instamos a o Gubierno d’Aragón y a o Departamento de Sanidat a que solucione ista situación a la mayor brevedat posible, adedicando l’ala cucha a l’uso asistencial como se dició en un primer momento, aumentando o numero de camas y amillorando a cobertura sanitaria d’os lugars d’a zona, entre os quals se troba L’Aínsa”, informa Ventero, ta recordar que “ista mesma reivindicación tamién ha estau tresladada a las Cortz d’Aragón por o suyo grupo parlamentario a traviés d’una Proposición no de Lei”.

Fuent: http://arainfo.org/2014/03/lainsa-reclama-al-gobierno-de-aragon-la-apertura-de-la-parte-cerrada-de-la-cuarta-planta-del-hospital-de-balbastro/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.