L’ALE alcuerda o suyo programa electoral ta 2014, con a enampladura interna como eixe destacau

A formación europea accepta l'ingreso d'o Bloc Nacionalista Valencià y de Nueva Canarias como a observadors. Chunta Aragonesista ye l'unico partiu d'o país que'n fa parti

Delegaus de l'ALE (Foto: Egon Zemmer)

Delegaus de l’ALE (Foto: Egon Zemmer)

L’Alianza Libre Europea (ALE) ha alcordau o programa que presentará t’as eleccions t’o Parlamento Europeu de 2014, con a enampladura interna d’a Unión Europea (UE) como un d’os suyos puntos centrals. A decisión l’han presa os delegaus de l’ALE en l’Asambleya Cheneral celebrada en Meran (Tirol d’o Sur) os diyas 12 y 13 d’abril.

L’ALE ye un partiu europeu formau por diferents partius nacionals que demandan a independencia, l’autonomía y/u dreitos lingüisticos y culturals t’os suyos territorios subestatals.

“As demandas institucionals y a enampladura interna son os nuestros afers principals. A igualdat lingüistica y a nuestra anvista sobre l’autonomía enerchetica son tres afers clau d’o programa”, declaró en Nationalia o director de l’ALE, Günther Dauwen. Seguntes ista anvista, os miembros de l’ALE consideran que la UE habría de reconoixer automaticament os nuevos estaus que surtisen, a traviés d’un procedimiento democratico, d’os estaus que ya son miembros d’a Unión. Iste podría estar o caso de Catalunya y Escocia en 2014.

As eleccions europeas se ferán entre o 22 y o 25 de mayo de l’anyada venient. En 2009, l’ALE consiguió siet escanyos. A cifra podría creixer si o Partiu Nacional Escocés y a Nueva Alianza Flamenca repiten os resultaus obtenius en as suyas respectivas eleccions nacionals más recients.

L’Asambleya Cheneral de l’ALE tamién ha decidiu d’admitir a dos nuevos miembros observadors: o Bloc Nacionalista Valencià y Nueva Canarias. O secretario cheneral d’o Bloque, Enric Morera, ha dito que l’admisión d’a suya formación yera “un trango entabant en a buena endrecera ta construyir a Europa d’os Pueblos y as personas”. O portavoz de Nueva Canarias, Pedri Quevedo, ha subrayau que o suyo partiu “comparte de tot as propuestas d’a esfensa d’una politica nacionalista, democratica y esfensora d’os dreitos humanos”.

Antimás, un partiu que dica agora yera observador, o Partiu de Slesvig (minoría alemanya en Dinamarca) s’ha feito miembro de pleno dreito d’o partiu europeu. O politico flamenco d’o N-VA Eric Defoort ye estau re-esleixiu como president de l’ALE, entre que o politico catalán d’ERC Jordi Solé continará como secretario cheneral d’a formación.

 

Fuent: http://www.nationalia.cat/ca/noticies/1413

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.