L’AN torna a desestimar a demanda d’a CHE ta continar as obras de Mularroya

Nuevo trucazo chudicial a l'entibo. Arias Cañete heba anunciau fa bella semana que continarían as obras

Foto: COAGRET

Foto: COAGRET

L’Audiencia Nacional ha desestimau a demanda d’a Confederación Hidrografica de l’Ebro de continar construyindo l’entibo de Mularroya. L’Audicencia Nacional torna a considerar que ye “inchustificau continar con os treballos en l’entibo de Mularroya por os motivos de seguridat que diz a CHE”, y le indica que ta cumplir con a sentencia d’a propia Audiencia Nacional de 2009, lo que habría de fer ye baixar o ran de l’entibo a 421 metros, en cuenta de prebar de puyar-la dica os 454 metros.

Coagret valura de traza muito positiva l’auto d’a AN y recorda que “encara resuenan as parolas trunfalistas d’o ex ministro Arias Cañete sobre que en bells diyas l’Audiencia Nacional autorizaría a la CHE ta continar con as obras en Mularroya, quan ya contaba con un auto recient que daba un firme trucazo a las argumentacions d’a CHE y o Ministerio ta chustificar que continasen as obras por motivos de seguridat”.

L’Audiencia Nacional ya desestimó ista demanda d’a CHE en aviento de 2013. En ixe auto l’AN indicaba que “l’Administración demanda que le deixen plegar en o ran minimo de seguridat de 454,50 m.s.r.m. en base a los “correspondients estudios hidrolochicos y hidraulicos” que no constan en as actuacions; o ran que se preba de plegar-ie ye parellano a o que tendrá l’entibo de rematar-se; no s’alporta garra informe que acredite que, como diz l’Administración, puyar o ran dica l’altaria sinyalada no suposará afeccions ambientals significativas “más que más quan a nulidat d’o prochecto de construcción se basa en a insuficiencia d’a declaración d’impacto ambiental”; se deduce que os treballos de l’entibo continoron a tamás d’a sentencia, plegando en o ran que tien agora de 438,00 m.s.r.m.”.

En ixas envueltas, a Sala consideró que as midas que se demandaban “no yeran endrezadas a executar a sentencia dictada en autos sino a continar as obras que o prochecto suyo s’heba anulau”.

L’asociación Jalón Vivó presentó, en setiembre de 2013, cientos de alegacions contra la demanda d’a CHE.

“Una vegada más -sinyala Coagret-, femos un clamamiento a la racionalidat y a lo sentiu común, demandando-le a la CHE que descarte ta cutio ista obra malfurriadora, tanto t’as arcas publicas como t’os potencials beneficiarios, con grieus impactos ambientals sobre zonas protechidas ZEPA y LIC y tamién con conflictividat chudicial y social en contra d’ella”.

 

Fuent: http://arainfo.org/2014/06/la-vuelve-desestimar-la-peticion-de-la-che-para-continuar-las-obras-de-mularroya/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.