L’Aragón y lo Tarazona continan con opcions d’ascenso a la Segunda División B

Resultaus d'a fase d'ascenso a la Segunda División B

Partiu d'o Tarazona contra l'Atletico Levante en a Fase d'ascenso de 2015. (Fuent: Wikimedia Commons)

Partiu d’o Tarazona contra l’Atletico Levante en a Fase d’ascenso de 2015. (Fuent: Wikimedia Commons)

Los equipos aragoneses que se son chugando l’ascenso a la 2a división B han teniu resultaus dispars en a primera eliminatoria, que los suyos partius de tornada se chugoron iste cabo de semana. Contino femos un repaso d’os suyos resultaus.

Lo Esportivo Aragón, como campión d’o grupo aragonés d’a Tercera División, se chugaba con o Mallorca B, primer clasificau d’o grupo balear, una opción d’ascenso directo. Dimpués d’empazar a zero la semana pasada en a Ciudat Esportiva, lo Mallorca B ganó en Son Bibiloni por 2-0, con gols de Domingo (min. 22) y Calderón (min. 47), aconseguindo asinas l’ascenso. Lo filial d’o Reyal Zaragoza, manimenos, encara conserva opcions, pa lo qual ha de chugar y ganar las dos siguients tongadas d’a fase d’ascenso.

Los equipos que quedoron 2o, 3o y 4o en o grupo aragonés, han de superar tres eliminatorias pa alcanzar lo deseyau ascenso. En a primera, lo C.E. Teruel quedó eliminau dimpués de perder ahiere por 1-0 (Rafeta en o min. 71) contra l’Ontinyent C.F. , equipo que ya heba redotau a los aragoneses en o Estadio de Pinilla por 2-0, fendo un total de 3-0 en a eliminatoria a favor de l’equipo valenciano.

L’Andorra C.F.  se chugaba ista primer eliminatoria con a U.D. Almansa en o Estadio Juan Antonio Endeiza, dimpués d’haber empazau a zero en a ciudat manchega. Lo partiu remató sin gols en tierras baixoaragonesas, empaz que no se trencó en la prorroga, y que levó a resolver la eliminatoria en a tanda de penaltis. No i tenioron suerte los andorranos, que marcoron 3 penaltis por 4 d’a U.D. Almansa, y continará l’anyada venient, igual que lo C.E. Teruel, en a Tercera División.

La Sociedat Esportiva Tarazona, por contra, tenió lo resultau mas positivo d’a chornada pa los equipos aragoneses, vencendo a l’Agrupación Deportiva San Juan por 1 a 0 en o Estadio Municipal, dimpués d’haber empazau a zero en o campo d’o club pamplonés. Juan José Oliver Hernandez poneba en o minuto 17 lo gol que le valeba a lo Tarazona pa superar la eliminatoria y continar soniando con puyar enta la Segunda División B.

Por tanto, lo Esportivo Aragón y lo C.F. Tarazona son estaus los solos equipos aragoneses presents en o sorteyo d’a segunda tongada d’ista fase d’Ascenso. Lo sorteyo ha emparellau a la S.E. Tarazona con l’Ontinyent y a lo Esportivo Aragón con lo C.D. Choco, equipo d’a localidat gallega de Redondela. Los partius d’ida, en Tarazona y Redondela, serán lo cabo de semana d’o 5 de chunyo, y los de tornada, en Ontinyent y Zaragoza, lo d’o 12 de chunyo.  Si resultan vencedors en ista eliminatora, los equipos aragoneses encara habría de superar unatra eliminatoria pa acompanyar l’anyana venient a lo Club Esportivo Ebro en la Segunda División B.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.