L’aragonés en a portalada d’o nuevo prochecto de Google sobre luengas en periglo

En o prochecto l'aragonés amaneixe como una d'as luengas con más periglo d'extinción

O chigant tecnolochico Google ha enchegau un nuevo prochecto pa mirar de preservar a diversidat lingüistica mundial. O lanzamiento d’o prochecto ye estau liderau por Google, con a supervisión d’o First Peoples’ Cultural Council y  l’Institute for Language Information and Technology, ILIT, d’a Universidat Oriental de Michigan y a colaboración d’a Universidat de Hawaii en Manoa.  Con iste prochecto Google ha meso a suya tecnolochía a disposición d’as organizacions y comunidatz que treballan pa fer frent a la menaza d’as luengas documentando-las, preservando-las y amostrando-las. Iste puesto d’a web mira d’ofrir información esviellada y completa sobre as luengas en periglo d’extinción con a participación de partners de tot o mundo. Tamién se mira l’intercambio d’experiencias, conoiximientos y casos practicos entre as comunidatz d’usuarios y scientificos que treballan en a revitalización de diferents idiomas en periglo, ubrindo una finestra ta una audiencia global y favoreixiendo a colaboración. O ret de participants en iste lanzamiento s’ha constituiu en una “Alliance for Linguistic Diversity”, creyada pa accelerar, reforzar y catalizar as actividatz relacionadas con a documentación de luengas en periglo, y o refirme a comunidatz que luitan por a revitalización d’as suyas luengas.

L’aragonés tien una presencia vistera en ista pachina en a suya devantadera, ya que amaneixe en a portalada, a o canto d’o Koro, o Navajo y l’Ojibwa sudoccidental. En o cobalto d’a pachina tamién se puede veyer y navegar un mapa d’as luengas en periglo, a on l’aragonés amaneixe como un puntet royo (http://www.endangeredlanguages.com/#/4/46.919/-1.209/-1/0/low/mid/high/unknown), con o significau de Luenga en grieu periglo d’extinción, que ye o mas alto libel de periglo considerau por os grupos d’investigación que supervisan o prochecto.  Dentrando en a pachina especifica de l’Aragonés (http://endangeredlanguages.com/lang/949), as personas intresadas trobarán datos sobre a nuestra luenga, asinas como una important replega de muestras audiovisuals en aragonés, cedidas por l’Archivo Audiovisual de l’Aragonés (http://www.acparola.com/aaa) y atros documentos d’importancia sobre a luenga, a ortografía y a codificación de l’aragonés, cedius por o Estudio de Filolochía Aragonesa, uno d’os colaboradors d’iste prochecto.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.