L’aragonés tendrá concellería propia en o Concello de Uesca

Se preveye creyar una Escuela Municipal d'Aragonés y diversas actividatz culturals arredol de l'idioma

21 julio, 2015 | Cultura, Plana de Uesca | Autor: Arredol | Tweet

Foto: Concello de Uesca

O Concello de Uesca dispondrá mientres os venients quatro anyos d’una concellería especifica pa l’idioma aragonés. O concello, gubernau por Luis Felipe d’o PSOE con o emparo d’Aragón Sí Puede y Cambiar Uesca, que tamién han entrau en o gubierno municipal, desenrollará diversas midas en defensa d’o idioma aragonés.

Ista aria ye dirichida por a 2º Tenient d’Alcalde, Mary Romero, d’Aragón Sí Puede, a marca con que Podemos se presentó en Uesca, conta entre as suyas iniciativas con a creyación d’una Escuela Municipal d’Aragonés asinas como a realización de diferents actividatz culturals y formativas arredol d’a luenga aragonesa. Tamién demandarán a derogación de l’actual lei de luengas.

Con ista concellería, l’aragonés disposa d’unatro espacio institucional dimpués d’a creyación d’a Dirección Cheneral de Politica Lingüistica d’o Gubierno d’Aragón, encara pendient de conoixer o nombre d’a persona que la chestionará.