L’arte vanguardista plega en Monzón

Obras de Pablo Serrano, Salvador Victoria, José Luis Cano u Pepe Cerdá podrán viyer-se d'o 17 t'o 28 d'aviento en Casa Aguilar de Monzón

"Resiste", de Ángel Rodrigo Pascual, 1996. (Foto: D.Ch.A.)

“Resiste”, de Ángel Rodrigo Pascual, 1996. (Foto: D.Ch.A.)

Un total de 28 cuadros y quatre esculturas que perteneixen a artistas aragoneses de meyaus d’o sieglo XX plegan en Monzón. Ye a exposición “As vanguardias aragonesas en a colección d’o Concello d’Alcanyiz” que se podrá visitar dende o 17 dica o 28 d’aviento en a Casa de Cultura de Monzón. A muestra, que ha organizau a dirección cheneral de Cultura d’o Gubierno d’Aragón, ye composada por una triga d’os fundos que o Concello d’Alcanyiz ha iu chuntando mientres o zaguer sieglo. Se i exponen obras de  José Manuel Broto, Salvador Victoria, Natalio Bayo, José Luis Cano, Enrique Larroy, Ignacio Fortún, Pepe Cerdá, Gómez Ascaso, José Luis Lasala, Ángel Pascual u Vicente Vilarrocha, entre atros.Ista exposición se caracteriza por achuntar a una important colla d’artistas aragoneses que destacoron por influyir en l’entorno artistico y social dende 1960 dica finals d’as anyadas 80. De vez que creyaban obras novedosas y de vanguardia, manteneban una actitut critica sobre a realidat social y cultural d’alacez. Muitos d’ells perteneixioron a collas que revolucionoron o mundo de l’arte como estió a colla El Paso, que’n yera parti Pablo Serrano; a colla Forma con Enrique Larroy; a colla Azuda 40 que’n yeran miembros  Natalio Bayo, José Luis Cano y José Luis Lasala; a colla Trama con José Manuel Broto y Gonzalo Tena; u El Zotall que i perteneixeban  Carmelo Rebullida, Luis Salas u Emilio Abanto.

Chunto a ells figuran artistas con trachectorias más independients pero igual de decisivos en o panorama artistico aragonés como Salvador Victoria en o suyo inte u Pepe Cerdá en l’actualidat.

A muestra, que a suya devantadera se fació en o Centro d’Arte y Naturaleza CDAN – Fundación Beulas, ha pasau por atras localidatz aragonesas como Samianigo, Borcha u Tardienta.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.