L’Asambleya de Corcega apreba l’estatuto de cooficialidat d’a luenga corsa

L'aprebación no tien efectos legals por l'inte: ye l'Asambleya Nacional francesa qui ha de dar a cooficialidat efectiva d'o corso y o francés

Toponimia en corso (Foto: Wikipedia)

Toponimia en corso (Foto: Wikipedia)

En una votación historica o pasau viernes 17, l’Asambleya de Corcega ha aprebau un estatuto de cooficialidat t’a luenga corsa. L’aprebación de l’estatuto ha conseguiu a unanimidat d’os miembros de l’Asambleya presents a la hora d’a votación: 36 han refirmau a equiparación legal d’o corso y o francés, entre que 11 no han quiesto participar en a votación y 4 se’n han absteniu (istos 15 diputaus son d’a oposición de dreitos y una chicota parti d’a centro-cucha gubernamental), seguntes explican France 3 Corse en a suya cuenta de Twiter y la radio corsa Alta Frequenza, que adhibe que una diputada d’a dreita sí que’n ha votau a favor.

Como ya heban anunciau, tanto los autonomistas de Femu a Cordica como os independentistas de Corsica Libera han votau en bloque a favor de l’estatus de cooficialidat. Tamién lo han feito a más gran parti d’os diputaus d’o centro-cucha, que gubierna en a isla.

S’han confirmau asinas as previsions que Pierre Ghionga, president d’o Consello d’a Luenga Corsa y redactor d’a propuesta de cooficialidat, feba chusto fa un mes, quan deciba que bi heba una “gran mayoría” a favor de dar-le caracter oficial a la luenga propia d’a isla. En ixa ocasión explicaba que a votación de l’Asambleya de Corcega no daría automaticament a oficialidat a lo corso. Cal remerar que ista cambra no tien poders lechislativos, y que en tot caso, hab´ra d’estar l’Asambleya Nacional francesa qui voten una lei, u cambien a constitución, plegau o caso – que de caracter oficial a lo corso.

Ghionga considera que sería inconcebible que a Republica Francesa s’oposase “a la voluntat democratica d’una rechión”. Alavez, agora a  pilota ye en o tellau de París.

Administración y escuela

L’administración y a escuela son os dos grans pilars, sobre los que o textos prevei bastir a oficialidat d’o corso. D’una man, l’estatuto de cooficialidat replega que as dos luengas han de poder fer-se servir por os ciudadans en as suyas relacions con l’administración publica. Y d’atra, o texto prevei a introducción cheneral d’o corso como luenga vehiclar en as escuelas, con l’obchectivo de conseguir una población d’a isla de tot bilingüe.

 

Fuent: http://www.nationalia.cat/ca/noticies/1451

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.